 ສູນການທ່ອງທ່ຽວຍາຈາງ, ແຂວງແຄ້ງຮວ່າ (ພາບ: VOV) |
ເປັນຄັ້ງທຳອິດທີ່ ອ້າຍ ນີເອອີ ພາຄອບຄົວຈາກຕາແສງ ບວນດົນ, ແຂວງ ດັກລັກ ໄປຕົວເມືອງແຂວງ ແຄ້ງຮວ່າ ພັກຜ່ອນຢ່ອນອາລົມ, ອ້າຍແບ່ງປັນຄວາມຮູ້ສຶກ ເມື່ອໄດ້ສຳຜັດກັບຄື້ນ ແລະ ສາຍລົມຢູ່ທະເລ ແລະ ຮັບປະທານອາຫານທະເລ. ອ້າຍ ນີເອອີ ໃຫ້ຮູ້ວ່າ:
ພວກຂ້າພະເຈົ້າມາແຫ່ງນີ້, ຊົມຖະໜົນທະເລ ຍາຈາງ, ແລ້ວໄປ ອາບນ້ຳຢູ່ທະເລ ຢົກເລັດ, ທະເລຢູ່ທີ່ນີ້ສວຍງາມທີ່ສຸດ ແລະ ພວກຂ້າພະເຈົ້າຍັງໄດ້ຮັບປະທານອາຫານທະເລຊະນິດຕ່າງໆ. ຖ້າເສັ້ນທາງຄວາມໄວສູງ ແຄ້ງຮວ່າ - ບານເມທວດ ກໍ່ສ້າງສຳເລັດ, ການແລກປ່ຽນຄ້າຂາຍຈະສະດວກກວ່າ, ແລະແຂກທ່ອງທ່ຽວຈະມາທ່ຽວຫຼາຍກວ່າ.
ໂດຍກຳໄດ້ຄວາມຕ້ອງການຂອງແຂກທ່ອງທ່ຽວ, ວິສາຫະກິດຫຼາຍແຫ່ງ ຢູ່ ດັກລັກ, ແຄ້ງຮວ່າ ພວມສ້າງບັນດາຜະລິດຕະພັນທ່ອງທ່ຽວລະຫວ່າງເຂດ, ເປີດກວ້າງສະຖານທີ່ທ່ອງທ່ຽວ ແທນທີ່ຂຸດຄົ້ນ ສະຖານທີ່ທ່ອງທ່ຽວແຫ່ງດ່ຽວ. ນີ້ກໍ່ແມ່ນພື້ນຖານເພື່ອໃຫ້ວິສາຫະກິດສ້າງບັນດາ tour ເສັ້ນທາງໜຶ່ງ - ທ່ອງທ່ຽວໄດ້ຫຼາຍ”, ຫັນປ່ຽນການທ່ອງທ່ຽວພາກພື້ນ ຈາກການຂຸດຄົ້ນຄວາມສາມາດບົ່ມຊ້ອນໄປສູ່ການພັດທະນາແບບຍືນຍົງ, ມີລວງເລິກເທື່ອລະກ້າວ. ທ່ານ ຫງວຽນມິງຈີ, ບໍລິສັດທ່ອງທ່ຽວ ມິງຈີ Travel, ແຂວງ ດັກລັກ, ໃຫ້ຮູ້ວ່າ ບັນດາວິສາຫະກິດ ທ່ອງທ່ຽວຢູ່ ແຄ້ງຮວ່າ ແລະ ດັກລັກ ພວມເປັນເຈົ້າການສ້າງຜະລິດຕະພັນເຊື່ອມຕໍ່ເຂດ.
 ເຂດພາງກາງຕອນໃຕ້ - ໄຕງວຽນມີຫຼາຍຜະລິດຕະພັນວັດທະນະທຳທ່ອງທ່ຽວທີ່ພົ້ນເດັ່ນ (ພາບ: VOV) |
ເສັ້ນທາງໜຶ່ງຈະມີສະຖານທີ່ທ່ອງທ່ຽວຕື່ມອີກຫຼາຍແຫ່ງ, ເສັ້ນທາງນັ້ນ ທັງມີທະເລ, ມີປ່າ, ມີວັດທະນະທຳ, ອາຫານການກິນ. ເສັ້ນທາງຈະເຊື່ອມຕໍ່ ດັກລັກ ແລະ ແຄ້ງຮວ່າ ກາຍເປັນຜະລິດຕະພັນທ່ອງທ່ຽວທີ່ສົມບູນ. ໃນການທ່ອງທ່ຽວ 3 ວັນ, ແຂກທ່ອງທ່ຽວຈະໄດ້ ອາບນ້ຳທະເລຢູ່ແຄ້ງຮວ່າ, ໄດ້ຄົ້ນຫານ້ຳຕົກຕາດ ເງັງຟອງ ຢູ່ທາງທິດຕາເວັນອອກ ດັກລັກ, ແລະໄປ ຄົ້ນຫາວັດທະນະທຳ, ຫ້ວຍນ້ຳ, ພູຜາປ່າໄມ້, ໜອງ, ນ້ຳຕົກຕາດຢູ່ດັກລັກ.
ທ່ານ ເລຈີກົງ, ຫົວໜ້າພະແນກການທ່ອງທ່ຽວ, ມະຫາວິທະຍາໄລ ຍາຈາງ, ໃຫ້ຂໍ້ສັງເກດວ່າ ໄຕງວຽນ - ພາກກາງຕອນໃຕ້ ແມ່ນສະຖານທີ່ພັດທະນາຈຳເພາະ, ທັງມີປ່າ - ທະເລ - ພູພຽງ ແລະ ສີສັນວັດທະນະທຳບັນດາເຜົ່າ. ເຖິງຢ່າງໃດກໍຕາມ, ບັນຫາໃຫຍ່ທີ່ຕ້ອງແກ້ໄຂໃນປັດຈຸບັນ ນັ້ນແມ່ນພື້ນຖານໂຄງລ່າງຄົມມະນາຄົມເຊື່ອມຕໍ່ ແຄ້ງຮວ່າ - ດັກລັກ ຍັງບໍ່ທັນຄົບຊຸດ, ການໂດຍສານເສຍເວລາຫຼາຍ, ເຊິ່ງໄດ້ສົ່ງຜົນສະທ້ອນເຖິງການສ້າງ tour ທ່ອງທ່ຽວເຊື່ອມຕໍ່ເຂດ. ຄຽງຄູ່ກັນນັ້ນແມ່ນຂໍ້ຈຳກັດກ່ຽວກັບບຸກຄະລາກອນ ແລະ ຄວາມສາມາດນຳໃຊ້ວິທະຍາສາດ - ເຕັກໂນໂລຢີ ກໍ່ພວມກີດຂວາງການບຸກທະລຸຂອງການທ່ອງທ່ຽວເຂດ. ທ່ານ ເລຈີກົງ ຖືວ່າ ບັນດາບຸກທະລຸຍຸດທະສາດເຊິ່ງກອງປະຊຸມໃຫຍ່ຄັ້ງທີ XIV ຂອງພັກ ໄດ້ກຳນົດນັ້ນແມ່ນ “ການແກ້ໄຂ” ຂໍ້ຈຳກັດເຫຼົ່ານີ້:
ຕາມຂ້າພະເຈົ້າແລ້ວ ການບຸກທະລຸກ່ຽວກັບການເຊື່ອມຕໍ່ພື້ນຖານໂຄງລ່າງຈະສ້າງເງື່ອນໄຂໃຫ້ການສ້າງບັນດາເສັ້ນທາງ ແລະ ສະຖານທີ່ທ່ອງທ່ຽວເຊື່ອມຕໍ່ເຂດ, ເຊື່ອມຕໍ່ ລະຫວ່າງເຂດພູພຽງ ແລະ ເຂດແຄມທະເລຢ່າງມີປະສິດທິຜົນ, ຜ່ານນັ້ນກຈະແກ່ຍາວເວລາພັກເຊົາ, ເພີ່ມມູນຄ່າໃຊ້ຈ່າຍ ແລະ ຍົກສູງກຳລັງແກ້ງແຍ້ງຂອງສະຖານທີ່ທ່ອງທ່ຽວ. ທີສອງ, ການພັດທະນາຊັບພະຍາກອນມະນຸດດ້ານການທ່ອງທ່ຽວທີ່ມີຄຸນນະພາບສູງ, ຕິດພັນກັບ ວັດທະນະທຳ - ຊີວະພາບຈຳເພາະຂອງເຂດ, ຈະປະກອບສ່ວນຍົກສູງຄຸນນະພາບການບໍລິການ, ຊຸກຍູ້ການທ່ອງທ່ຽວວົງຄະນະຍາດ ແລະ ສ້າງເງື່ອນໄຂຫາເງິນລ້ຽງຊີບແບບຍືນຍົງໃຫ້ແກ່ຊາວທ້ອງຖິ່ນ.
 ໃນໄລຍະເວລາສັ້ນໆ, ແຂກທ່ອງທ່ຽວອາດສາມາດລົງຕົວຈິງກັບເສັ້ນທາງທີ່ມີສະຖານທີ່ທ່ອງທ່ຽວຫຼາຍແຫ່ງ ລວມມີ: ທະເລ, ປ່າ, ວັດທະນະທຳ (ພາບ: VOV) |
ກຳແໜ້ນທິດທາງໃຫຍ່ທີ່ກອງປະຊຸມໃຫຍ່ຄັ້ງທີ XIV ຂອງພັກໄດ້ກຳນົດ, ປະຊາຄົມວິສາຫະກິດ ແຄ້ງຮ່ວາ ພວມເປັນເຈົ້າການມຸ່ງໄປເຖິງບັນດາຜະລິດຕະພັນທີ່ມີການລົງຕົວຈິງສູງ, ເພີ່ມຄຸນນະພາບການບໍລິການ ແລະ ການເຊື່ອມຕໍ່ລະບົບມູນຄ່າ. ທ່ານ ຟ້າມມິງຍຶດ ປະທານສະມາຄົມການທ່ອງທ່ຽວແຂວງ ແຄ້ງຮວ່າ ໃຫ້ຮູ້ວ່າ:
ພວກຂ້າພະເຈົ້າຈະໝູນໃຊ້ທຸກສິ່ງທຸກຢ່າງທີ່ຕົນເອງມີຢູ່ແລ້ວໃນປັດຈຸບັນ, ຕ້ອງເຮັດແນວໃດເພື່ອສ້າງບັນດາລາຍການຜະລິດຕະພັນ, ການບໍລິການ, ເພີ່ມຄຸນນະພາບໃນການຮັບໃຊ້. ເປົ້າໝາຍແມ່ນເພື່ອໃຫ້ແຂກທ່ອງທ່ຽວມາແຂວງ ແຄ້ງຮວ່າ ຫຼາຍກວ່າອີກ ແລະ ການເຕີບໂຕບັນລຸໄດ້ເປົ້າໝາຍນຳສອງຕົວເລກຕາມມະຕິກອງປະຊຸມໃຫຍ່ຄັ້ງທີ XIV ຂອງພັກ. ຕ້ອງສ້າງທີ່ຕັ້ງຄືນໃໝ່, ສ້າງໂຄງປະກອບຄືນໃໝ່, ຫັນເປັນດີຈີຕອນ, ພັດທະນາເສດຖະກິດໝູນວຽນ ຕາມທິດສີຂຽວ ແລະ ຍືນຍົງ. ນີ້ບໍ່ພຽງແຕ່ແມ່ນວິທີການແກ້ໄຂ ຫາກຍັງແມ່ນຄວາມຕ້ອງການຈຳເປັນທີ່ຕ້ອງເຮັດອີກດ້ວຍ.
ດ້ວຍເປົ້າໝາຍຕ້ອນຮັບແຂກທ່ອງທ່ຽວໃຫ້ໄດ້ 18,8 ລ້ານ ເທື່ອຄົນໃນປີ 2026, ແຂວງ ແຄ້ງຮວ່າ ຫວັງວ່າ ການທ່ອງທ່ຽວຈະກາຍເປັນຂະແໜງເສດຖະກິດປາຍແຫຼມ, ປະກອບສວ່ນສຳຄັນໃຫ້ແກ່ໄລຍະການເຕີບໂຕຂອງແຂວງ. ພິເສດ, ເສີມຂະຫຍາຍບົດບາດນຳພາ, ໜູນຊ່ວຍ ບັນດາທ້ອງຖິ່ນໃນພາກກາງຕອນໃຕ້ - ໄຕງວຽນຢ່າງແຮງຂອງແຂວງແຄ້ງຮວ່າ . ທ່ານ ຫງວຽນລອງບຽນ ຮອງປະທານຄະນະກຳມະການປະຊາຊົນແຂວງ ແຄ້ງຮວ່າ ເນັ້ນໜັກວ່າ:
ພວກເຮົາຕ້ອງເຊື່ອມຕໍ່, ສ້າງບັນດາຜະລິດຕະພັນທີ່ມີສີສັນສະເພາະ. ພວກເຮົາມີຫຼາຍໂອກາດຍ້ອນມີຫຼາຍສີສັນ, ບໍລິເວນເພື່ອພັດທະນາ. ໃນໄລຍະຈະມາເຖິງຕ້ອງສຸມໃສ່ຫຼາຍໂຄງການ, ເຫດການ, ເພີ່ມຖ້ຽວບິນ, ສ້າງເສັ້ນທາງໃໝ່ຕື່ມອີກ, ຈັດຕັ້ງບັນດາລາຍການ, ເຫດການທີ່ມີຂອບຂະໜາດໃຫຍ່, ສົ່ງເສີມການໂຄສະນາກໍ່ຕ້ອງສົມກັບລະດັບ.
ໃນສະພາບການໃໝ່, ການເຊື່ອມຕໍ່ເຂດ ໄຕງວຽນ - ພາກກາງຕອນໃຕ້ ບໍ່ພຽງແຕ່ແມ່ນວິທີການໃນສະເພາະໜ້າເທົ່ານັ້ນ ຫາກຍັງແມ່ນທິດທາງຍຸດທະສາດໄລຍະຍາວ. ເມື່ອພື້ນຖານໂຄງລ່າງໄດ້ຮັບການລົງທຶນ, ວິສາຫະກິດປ່ຽນແປງໃໝ່ຈິນຕະນາການ, ທ້ອງຖິ່ນຕ້ອງເປັນເຈົ້າການສ້າງບໍລິເວນພັດທະນາ, ຂະແໜງການທ່ອງທ່ຽວແຂວງ ແຄ້ງຮວ່າ ເວົ້າສະເພາະ ແລະ ພາກກາງຕອນໃຕ້ ເວົ້າລວມ ສາມາດບືນຕົວຂຶ້ນ, ປະກອບສ່ວນໃຫ້ແກ່ເສດຖະກິດເຂດ ແລະ ປະເທດນັບມື້ນັບຫຼາຍກວ່າອີກ.
