ອາເມລິກາ ເລີ່ມດຳເນີນພິທີລົງນາມການສ້າງຕັ້ງສະພາສັນຕິພາບ ເຂດ ກາຊາ

(VOVWORLD) - ພິທີລົງນາມການສ້າງຕັ້ງສະພາສັນຕິພາບເຂດ ກາຊາ ຢ່າງເປັນທາງການຖືກຈັດຂຶ້ນໃນວັນທີ 22 ມັງກອນ, ຢູ່ນອກກອງປະຊຸມປະຈຳປີຄັ້ງທີ 56 ຂອງເວທີປາໄສເສດຖະກິດໂລກ (WEF) ທີ່ພວມດຳເນີນຢູ່ Davos (ສະວິດ), ພາຍໃຕ້ການເປັນປະທານຂອງ ທ່ານ Donald Trump ປະທານາທິບໍດີ ອາເມລິກາ.

ທ່ານປະທານາທິບໍດີ ອາເມລິກາ Donald Trump ຈັບສົນທິສັນຍາສະພາສັນຕິພາບ ທີ່ໄດ້ລົງນາມໃນ 22/1/2026. (ພາບ: REUTERS/Denis Balibouse)

ດ້ວຍບົດບາດເປັນປະທານສະພາ, ທ່ານປະທານາທິບໍດີ Donald Trump ຢັ້ງຢືນວ່າ ສະພາຈະເຄື່ອນໄຫວດ້ວຍການສົມທົບກັບ ສປຊ ໃນບັນດາຄວາມມານະພະຍາຍາມຊຸກຍູ້ສັນຕິພາບ ແລະ ສະຖຽນລະພາບສາກົນ.

ໃນພິທີລົງນາມ, ການນຳ ແລະ ເຈົ້າໜ້າທີ່ຂັ້ນສູງທີ່ມາຈາກ 19 ປະເທດ ພ້ອມກັນລົງນາມໃນກົດລະບຽບກໍ່ຕັ້ງສະພາສັນຕິພາບເຂດ ກາຊາ. ບັນດາປະເທດດັ່ງກ່າວ ລວມມີ: ອາເມລິກາ, ອາກເມເນຍ, ອາກຊັງຕິນ, ອາເຊັກໄບຊານ, ບາເຣັນ, ບຸນກາຣີ, ຮຸງກາຣີ, ອິນໂດເນເຊຍ, ຈໍແດນ, ກາຊັກສະຖານ, ມົງໂກນ, ມາຣົກ, ປາກິດສະຖານ, ປາຣາກວາຍ, ກາຕາ, ອາຣັບບິ ຊະອຸດິ, ຕວັກກີ, ສະຫະລັດອາຣັບ ເອມມີເລດ (UAE) ແລະ ອູເບກິດສະຖານ.

ເມື່ອແຈ້ງການໃນພິທີ, ທ່ານນາງ Karoline Leavitt ເລຂາດ້ານສື່ມວນຊົນຂອງທຳນຽບຂາວ ໃຫ້ຮູ້ວ່າ ກົດລະບຽບຂອງສະພາສັນຕິພາບເຂດ ກາຊາ ໂດຍ ອາເມລິກາ ລິເລີ່ມ ໄດ້ເລີ່ມມີຜົນບັງຄັບໃຊ້ແລ້ວ ແລະ ອາເມລິກາ ຖືສະພາດັ່ງກ່າວຄືດັ່ງເປັນກົນໄກສາກົນ ແນໃສ່ຊຸກຍູ້ບັນດາຄວາມມານະພະຍາຍາມຕໍ່ສັນຕິພາບ.