 (ພາບປະກອບ: REUTERS/Dado Ruvic) |
ວັນທີ 20 ຕຸລາ, ບັນດາປະເທດສະມາຊິກສະຫະພາບເອີຣົບ (EU) ໄດ້ຕົກລົງເປັນເອກະພາບຢຸດຕິການນຳເຂົ້າອາຍແກັດຈາກ ລັດເຊຍ ໃນທ້າຍປີ 2027, ພ້ອມທັງຢຸດຕິການຂຶ້ນກັບພະລັງງານຂອງ ລັດເຊຍ ໃນສະພາບການສົງຄາມຢູ່ ຢູແກຼນ ພວມແກ່ຍາວ. ໃນການປະຊຸມຢູ່ Luxembourg, ບັນດາລັດຖະມົນຕີກະຊວງພະລັງງານຂອງ EU ໄດ້ຮັບຮອງເອົາແຜນການຂອງຄະນະກຳມະການເອີຣົບ (EC) ເພື່ອແນໃສ່ປັດເຂ່ຍແຫຼ່ງສະໜອງອາຍແກັດຂອງ ລັດເຊຍ. ເຖິງຢ່າງໃດກໍຕາມ, ຂໍ້ຕົກລົງດັ່ງກ່າວຕ້ອງມີການໃຫ້ສັດຕະຍາບັນຂອງລັດຖະສະພາເອີຣົບ (EP).
ແດນມາກ, ປະເທດທີ່ດຳລົງບົດບາດເປັນປະທານໝູນວຽນ EU ຮອດທ້າຍປີ 2025, ຫວັງວ່າ EP ຈະ ຮັບຮອງເອົາຂໍ້ຕົກລົງນີ້ ກ່ອນປີໃໝ່. EU ຢາກຜ່ານການຢຸດຕິຊື້ອາຍແກັດຂອງ ລັດເຊຍ ເພື່ອສະກັດກັ້ນແຫຼ່ງການເງິນສຳຄັນຂອງປະເທດນີ້. ໃນ EU ມີ 2 ປະເທດ ສະໂລວາກີ ແລະ ຮຸງກາຣີ ແມ່ນຂຶ້ນກັບແຫຼ່ງອາຍແກັດ ລັດເຊຍ ຫຼາຍທີສຸດ ແລະ ຄັດຄ້ານມາດຕະການນີ້ ແຕ່ປັດຈຸບັນ ຍາກທີ່ຈະປະຕິເສດຄວາມຕັດສິນໃຈລວມຂອງທັງກຸ່ມນີ້ໄດ້.
