 ກອງປະຊຸມຄັ້ງທີ 5 ຄະນະຊີ້ນຳສູນກາງການຜັນຂະຫຍາຍການລົບລ້າງເຮືອນຢູ່ຊົ່ວຄາວ, ເຮືອນຮົ່ວເພໃນຂອບເຂດທົ່ວປະເທດ |
ຕອນເຊົ້າວັນທີ 22 ມິຖຸນາ, ຢູ່ສຳນັກງານລັດຖະບານ (ຮ່າໂນ້ຍ), ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມຄັ້ງທີ 5 ຄະນະຊີ້ນຳສູນກາງການຜັນຂະຫຍາຍການລົບລ້າງເຮືອນຢູ່ຊົ່ວຄາວ, ເຮືອນຮົ່ວເພໃນຂອບເຂດທົ່ວປະເທດ; ກອງປະຊຸມຄັ້ງທີ 18 ຄະນະຊີ້ນຳແຫ່ງລັດກ່ຽວກັບບັນດາກິດຈະກຳ, ໂຄງການສຳຄັນລະດັບຊາດ, ຈຸດສຸມຂອງຂະແໜງຄົມມະນາຄົມຂົນສົ່ງ ແລະ ກອງປະຊຸມຄັ້ງທີ 2 ກ່ຽວກັບການຊຸກຍູ້ການປ່ອຍເງິນລົງທຶນພາກລັດປີ 2025.
ເມື່ອກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ຊີ້ແຈ້ງວ່າ ປີ 2025, ຫວຽດນາມ ກຳນົດການເຕີບໂຕເສດຖະກິດ 8% ຂຶ້ນໄປ, ສ້າງທ່ວງທ່າ, ສ້າງແຫຼ່ງກຳລັງ ແລະ ຈິດໃຈໃຫ້ແກ່ການເຕີບໂຕ 2 ຕົວເລກໃນຊຸມປີຕໍ່ໄປ, ບັນລຸ 2 ເປົ້າໝາຍພັດທະນາ 100 ປີ.
ກ່ຽວຂ້ອງເຖິງການລົບລ້າງເຮືອນຢູ່ຊົ່ວຄາວ, ເຮືອນຮົ່ວເພ, ຄະນະຊີ້ນຳຕັດສິນໃຈປະຕິບັດສຳເລັດເປົ້າໝາຍນີ້ກ່ອນວັນທີ 02 ກັນຍາ 2025. ສຳລັບການລົບລ້າງເຮືອນຢູ່ຊົ່ວຄາວຂອງຜູ້ມີຄຸນງາມຄວາມດີຕໍ່ການປະຕິວັດ, ວາງເປົ້າໝາຍ ທົ່ວປະເທດຈະປະຕິບັດສຳເລັດກ່ອນວັນທີ 27 ກໍລະກົດ.
ກໍກ່ຽວຂ້ອງເຖິງການລົງທຶນສາທາລະນະ, ທ່ານນາຍົກລັດຖະມົນຕີ ຊີ້ແຈ້ງວ່າ ນີ້ແມ່ນວຽກງານທີ່ມີຄວາມສຳຄັນທີ່ສຸດ, ສ້າງວຽກເຮັດງານທຳ, ສ້າງໂອກາດພັດທະນາໃໝ່, ສ້າງບັນດາກິດຈະກຳ, ການເຄື່ອນໄຫວໃຫ້ປະມານ 40 ຂະແໜງອາຊີບທີ່ແຕກຕ່າງກັນ, ປະກອບສ່ວນເຂົ້າໃນການເຕີບໂຕຢ່າງຈະແຈ້ງ. ດັ່ງນັ້ນ, ບັນດາຜູ້ແທນຕ້ອງມີການໄຈ້ແຍກ, ປຶກສາຫາລືເພື່ອໃຫ້ການລົງທຶນພາກລັດນັບມື້ນັບມີປະສິດທິຜົນ.
ລ້າຍຮວາ
