ໃນການປະກາດໃນຕອນຄ່ຳທີ 23 ມິຖຸນານີ້, ເຊິ່ງເປັນການປະກາດທຳອິດພາຍຫຼັງທ່ານປະທານາທິບໍດີ ອາເມລິກາ Donald Trump ປະກາດຄຳສັ່ງຢຸດຍິງລະຫວ່າງ ອິດສະຣາແອັນ ແລະ ອີຣານ, ທ່ານນາຍົກລັດຖະມົນຕີ ອິດສະຣາແອັນ Benjamin Netanyahu ຢັ້ງຢືນວ່າ ອິດສະຣາແອັນ ຍາດໄດ້ໄຊຊະນະຄັ້ງປະຫວັດສາດໃນການສູ້ຢັນກັນດ້ານການທະຫານກັບ ອີຣານ ຢ່າງດຸເດືອດ ໃນ 12 ວັນ ແລະ ຄືນ. ຜູ້ນຳລັດຖະບານ ອິດສະຣາແອັນ ສືບຕໍ່ຢ້ຳຄືນທັດສະນະບໍ່ອະນຸຍາດໃຫ້ ອີຣານ ມີອາວຸດນິວເຄຼຍ, ພ້ອມທັງກ່າວເຕືອນວ່າ ຈະມີການກະທຳຢ່າງແຮງແບບທີ່ເຄີຍເຮັດ ຖ້າຫາກວ່າ ເຕເຮຣານ ຊອກຫາວິທີຟື້ນຟູໂຄງການນິວເຄຼຍ.
ກໍໃນຕອນຄ່ຳຂອງວັນດຽວກັນ, ວົງການເຈົ້າໜ້າທີ່ ອິດສະຣາແອັນ ໄດ້ປະກາດຟື້ນຟູການເຄື່ອນໄຫວຂອງສະໜາມບິນ Ben Gurion, ທ່າອາກາດສະຍານສາກົນໃຫຍ່ສຸດຂອງ ອິດສະຣາແອັນ ຄືນໃໝ່ຢ່າງຄົບຖ້ວນ. ຕາມນັ້ນແລ້ວ, ຄຳສັ່ງຈຳກັດກ່ຽວກັບຈຳນວນຜູ້ໂດຍສານໃນຖ້ຽວບິນໄປ - ມາ ສະໜາມບິນນີ້ ກໍຖືກຍົກເລີກ. ບັນດາຮ້ານຂາຍເຄື່ອງຢູ່ສະໜາມບິນທີ່ໄດ້ຍົກເວັ້ນພາສີ ກໍໄດ້ຮັບການເປີດປະຕູຄືນໃໝ່.
ໃນຂະນະນັ້ນ ຢູ່ ອີຣານ, ທ່ານປະທານາທິບໍດີ Masoud Pezeshkian ກໍປະກາດວ່າ ອີຣານ ໄດ້ຮັບໄຊຊະນະຄັ້ງປະຫວັດສາດ ແລະ ສິ້ນສຸດສົງຄາມ 12 ວັນ ໂດຍ ອິດສະຣາແອັນ ລິເລີ່ມ.
ນັກຂ່າວ VOV ປະຈຳ ອີຢິບ
