 ທ່ານປະທານປະເທດ ຈີນ ສີຈິ້ນຜິງ ແລະ ທ່ານປະທານາທິບໍດີ ອາເມລິກາ Donald Trump (ພາບ: REUTERS/Kevin Lamarque)
|
ຕອນຄ່ຳວັນທີ 5 ມິຖຸນາ, ທ່ານປະທານປະເທດ ຈີນ ສີຈິ້ນຜິງ ໄດ້ດຳເນີນການເຈລະຈາທາງໂທລະສັບກັບທ່ານປະທານາທິບໍດີ ອາເມລິກາ Donald Trump. ການເຈລະຈາທາງໂທລະສັບ ໄດ້ປະຕິບັດຕາມການສະເໜີຂອງການນຳອາເມລິກາ, ສ້າງຂີດໝາຍການຕິດຕໍ່ພົວພັນຄັ້ງທຳອິດລະຫວ່າງການນຳສອງທ່ານນັບແຕ່ເວລາການເຈລະຈາທາງໂທລະສັບ ເມື່ອວັນທີ 17 ມັງກອນ, ກ່ອນທ່ານ Trump ດຳລົງຕຳແໜ່ງປະທານາທິບໍດີ ອາເມລິກາ 2 - 3 ວັນ.
ທີ່ການເຈລະຈາທາງໂທລະສັບ, ທ່ານປະທານປະເທດ ຈີນ ສີຈິ້ນຜິງ ໄດ້ເນັ້ນໜັກເຖິງລະດັບຄວາມສຳຄັນຂອງການປັບປຸງໃຫ້ແກ່ການພົວພັນ ຈີນ - ອາເມລິກາໃຫ້ໄປຖືກທິດ. ທ່ານຢັ້ງຢືນ ວ່າ ການໂອ້ລົມສົນທະນາ ແລະ ການຮ່ວມມືແມ່ນການຄັດເລືອກທີ່ຖືກຕ້ອງໜຶ່ງດຽວ, ແລະ ຮຽກຮ້ອງໃຫ້ທັງສອງຝ່າຍປະຕິບັດບັນດາຂໍ້ຕົກລົງທີ່ບັນລຸໄດ້ໃນການເຈລະຈາດ້ານເສດຖະກິດຢູ່ເຊີແນວໃນໄລຍະຜ່ານມາຢ່າງເຂັ້ມງວດ. ສອງຝ່າຍຕ້ອງໝູນໃຊ້ກົນໄກປຶກສາຫາລືດ້ານເສດຖະກິດ - ການຄ້າ ທີ່ໄດ້ຮັບການສ້າງຕັ້ງແລ້ວໃຫ້ເປັນຢ່າງດີ, ຮັກສາທ່າທີສະເໝີພາບ, ເຄົາລົບນັບຖືບັນດາຄວາມສົນໃຈອັນຊອບທຳຂອງກັນ ແລະ ມຸ່ງໄປເຖິງໝາກຜົນຕ່າງຝ່າຍຕ່າງມີຜົນປະໂຫຍດ.
ໃນການເຈລະຈາ, ສອງຝ່າຍໄດ້ເຫັນດີຈະສືບຕໍ່ຮັກສາການແລກປ່ຽນ ແລະ ຍູ້ໄວການຈັດຕັ້ງຮອບເຈລະຈາຄັ້ງຕໍ່ໄປເພື່ອແນໃສ່ຊຸກຍູ້ການພົວພັນທີ່ເປັນປົກກະຕິ ແລະ ການຮ່ວມມືຢ່າງມີປະສິດທິຜົນກ່ວາລະຫວ່າງສອງພື້ນຖານເສດຖະກິດໃຫຍ່ທີ່ສຸດໃນໂລກ.
