 ທ່ານ Ilham Aliyev ປະທານາທິບໍດີ ອາເຊັກໄບຊານ ແລະ ທ່ານ ໂຕເລິມ ເລຂາທິການໃຫຍ່ ຫວຽດນາມ |
ໃນການພົບປະເຈລະຈາ, ທ່ານ Ilham Aliyev ປະທານາທິບໍດີ ອາເຊັກໄບຊານ ໃຫ້ຮູ້ວ່າ ອາເຊັກໄບຊານ ປາດຖະໜາຢາກຮ່ວມມືກັບ ຫວຽດນາມ ໃນຂົງເຂດ logistic, ທ່າກ່ຳປັ່ນທະເລ, ທາງລົດໄຟ, ທາງອາກາດ, ພະລັງງານທົດແທນ. ທ່ານປະທານາທິບໍດີ ອາເຊັກຊານ ມີຄວາມປາດຖະໜາຢາກດຶງດູດວິສາຫະກິດ ຫວຽດນາມ ມາດຳເນີນທຸລະກິດ ແລະ ລົງທຶນຢູ່ ອາເຊັກໄບຊານ.
 ການພົບປະເຈລະຈາສອງຝ່າຍ |
ສ່ວນທ່ານເລຂາທິການໃຫຍ່ ໂຕເລິມ ຢັ້ງຢືນວ່າ ຫວຽດນາມ ຍາມໃດກໍຖືເປັນສຳຄັນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືໃນຫຼາຍດ້ານກັບ ອາເຊັກໄບຊານ.
ເມື່ອແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ, ການນຳສອງທ່ານໄດ້ເນັ້ນໜັກເຖິງຄວາມສຳຄັນຂອງການແກ້ໄຂຄວາມບໍ່ລົງລອຍກັນ ແລະ ຄວາມແຕກຕ່າງກັນດ້ວຍມາດຕະການສັນຕິພາບ, ບົນພື້ນຖານເຄົາລົບກົດໝາຍສາກົນ ແລະ ກົດບັດ ສປຊ; ສະໜັບສະໜູນຫຼັກໝັ້ນຂອງ ອາຊຽນ ໃນບັນຫາທະເລຕາເວັນອອກ ສອດຄ່ອງກັບກົດໝາຍສາກົນ, ໂດຍສະເພາະແມ່ນສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ 1982.
 ທ່ານປະທານາທິບໍດີ Ilham Aliyev |
ພາຍຫຼັງການພົບປະເຈລະຈາ, ທ່ານເລຂາທິການໃຫຍ່ ໂຕເລິມ ແລະ ທ່ານປະທານາທິບໍດີ Ilham Aliyev ໄດ້ເປັນສັກຂີພິຍານພິທີລົງນາມໃນເອກະສານຮ່ວມມືຫຼາຍສະບັບ ແລະ ຮັບຮອງເອົາຖະແຫຼງການຮ່ວມ ກ່ຽວກັບການສ້າງຕັ້ງສາຍພົວພັນຄູ່ຮ່ວມມືຍຸດທະສາດ ຫວຽດນາມ - ອາເຊັກໄບຊານ. ຖະແຫຼງການຮ່ວມຊີ້ແຈ້ງວ່າ ຫວຽດນາມ ແລະ ອາເຊັກໄບຊານ ຈະສືບຕໍ່ເຮັດໃຫ້ການຮ່ວມືໃນບັນດາຂົງເຂດເລິກເຊິ່ງຂຶ້ນຕື່ມ.
ເມື່ອກ່າວຄຳເຫັນໃນການຖະແຫຼງຂ່າວຮ່ວມພາຍຫຼັງການພົບປະເຈລະຈາ, ທ່ານປະທານາທິບໍດີ ອາເຊັກໄບຊານ ເນັ້ນໜັກວ່າ ບັນດາເອກະສານທີ່ໄດ້ລົງນາມແລ້ວນັ້ນ ໄດ້ສະແດງໃຫ້ເຫັນວ່າ ສອງຝ່າຍລ້ວນແຕ່ມີບັນດາບາດກ້າວເດີນສຳຄັນເພື່ອມຸ່ງໄປເຖິງອະນາຄົດອັນດີງາມກວ່າໃຫ້ແກ່ສອງປະເທດ ໂດຍສະເພາະແມ່ນການຮ່ວມມືໃນຂົງເຂດການສຶກສາ, logistic.
 ທ່ານເລຂາທິການໃຫຍ່ ໂຕເລິມ |
ສ່ວນທ່ານເລຂາທິການໃຫຍ່ ໂຕເລິມ ຢັ້ງຢືນວ່າ ເພື່ອປະຕິບັດບັນດາເນື້ອໃນໃນຖະແຫຼງການຮ່ວມ, ນຳການພົວພັນສອງຝ່າຍກ້າວເຂົ້າສູ່ສັງກາດພັດທະນາໃໝ່, ສອງຝ່າຍບັນລຸໄດ້ຄວາມເຫັນດີສູງກ່ຽວກັບ 5 ກຸ່ມມາດຕະການ, ນັ້ນແມ່ນ:
“ເພີ່ມທະວີການພົບປະ, ແລກປ່ຽນຄະນະຜູ້ແທນທຸກຂັ້ນ, ພິເສດແມ່ນຂັ້ນສູງໃນທຸກຊ່ອງທາງ ພັກ, ລັດ, ສະພາແຫ່ງຊາດ ແລະ ທ້ອງຖິ່ນ. ຊຸກຍູ້ການພົວພັນລະຫວ່າງພັກຄອມມູນິດ ຫວຽດນາມ ກັບ ພັກ ອາເຊັກໄບຊານ ໃໝ່ກຳອຳນາດ ກໍຄືບັນດາພັກການເມືອງທີ່ມີທີ່ຕັ້ງບົດບາດຢູ່ ອາເຊັກໄບຊານ. ປະຕິບັດບັນດາເອກະສານ, ຂໍ້ຕົກລົງຂັ້ນສູງທີ່ໄດ້ລົງນາມແລ້ວໃຫ້ມີປະສິດທິຜົນ. ຍູ້ແຮງການຮ່ວມມືດ້ານເສດຖະກິດ - ການຄ້າຢ່າງແທດຈິງ, ຮອບດ້ານຜ່ານການເພີ່ມທະວີປະສິດທິຜົນຂອງຄະນະກຳມະການຮ່ວມມືດ້ານເສດຖະກິດ - ການຄ້າ ແລະ ວິທະຍາສາດ - ເຕັກນິກ, ຍູ້ແຮງການສົ່ງເສີມດ້ານການຄ້າ, ການລົງທຶນ, ເຊື່ອມຕໍ່ປະຊາຄົມວິສາຫະກິດສອງປະເທດ. ສຸມໃສ່ພັດທະນາການຮ່ວມມືໃນເສົາຄ້ຳພະລັງງານ - ນ້ຳມັນອາຍແກັດ, ຄົ້ນຄວ້າຊຸກຍູ້ການຮ່ວມມືໃນບັນດາຂົງເຂດທີ່ມີກຳລັງບົ່ມຊ້ອນ ເຊັ່ນ ການຂົນສົ່ງທາງລົດໄຟ, ທາງທະເລ, ກະສິກຳ ແລະ ອຸດສາຫະກຳປຸງແຕ່ງ, ປະດິດແຕ່ງ...”
ວັນຫຽວ
