 ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຟ້າມກ໋ວາງຫ້ຽວ |
ທ່ານເອກອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ຟ້າມກ໋ວາງຫ້ຽວ ໄດ້ຢັ້ງຢືນວ່າ ການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ ຍີ່ປຸ່ນຈະສ້າງກຳລັງໜູນໃໝ່ຢ່າງແຮງໃຫ້ແກ່ການພົວພັນສອງຝ່າຍ ເມື່ອຕອບສຳພາດຕໍ່ນັກຂ່ວຂອງ ວິທະຍຸກະຈາຍສຽງ ຫວຽດນາມ ປະຈຳ ຍີ່ປຸ່ນເນື່ອງໃນໂອກາດທ່ານນາຍົກລັດຖະມົນຕີ ຍີ່ປຸ່ນ Ishiba Shigeru ຈະມາຢ້ຽມຢາມ ຫວຽດນາມ ຢ່າງເປັນທາງການໃນລະຫວ່າງວັນທີ 27 – 29 ເມສາ 2025.
ຕາມທ່ານເອກອັກຄະລັດຖະທູດ ຟ້າມກວາງຫ້ຽວແລ້ວ, ການຢ້ຽມຢາມ ຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ ຍີ່ປຸ່ນຄັ້ງນີ້ມີຄວາມໝາຍສຳຄັນທີ່ສຸດ, ແມ່ນການຢ້ຽມຢາມ ຫວຽດນາມ ຄັ້ງທຳອິດຂອງທ່ານນາຍົກລັດຖະມົນຕີ Ishiba Shigeru, ພາຍຫຼັງສອງປະເທດຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ ແລະ ຄວາມວັດທະນາຖາວອນຢູ່ອາຊີ ແລະ ໃນໂລກ. ນີ້ບໍ່ພຽງແຕ່ແມ່ນໂອກາດເພື່ອໃຫ້ສອງຝ່າຍຕີລາຄາຄືນວິວັດການຮ່ວມມືໃນໄລຍະຜ່ານມາເທົ່ານັ້ນ ຫາກຍັງສຳຄັນກ່ວາອີກແມ່ນສອງຝ່າຍຈະແລກປ່ຽນຢ່າງເລິກເຊິ່ງ, ແທດຈິງເພື່ອນຳການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດກ້າວເຂົ້າສູ່ໄລຍະພັດທະນາໃໝ່ໃນສັງກາດໃໝ່. ທ່ານເອກອັກຄະລັດຖະທູດ ຟ້າມກວາງຫ້ຽວ ໃຫ້ຮູ້ວ່າ:
ຂ້າພະເຈົ້າຫວັງວ່າ ການຢ້ຽມຢາມຄັ້ງນີ້ຂອງທ່ານນາຍົກລັດຖະມົນຕີ Ishiba Shigeru ຈະສ້າງກຳລັງໜູນໃໝ່ຢ່າງແຮງໃຫ້ແກ່ການພົວພັນສອງຝ່າຍ, ເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງເລິກເຊິ່ງກ່ວາອີກ, ການພົວພັນທີ່ສະໜິດຕິດພັນລະຫວ່າງການນຳຂັ້ນສູງສອງປະເທດ, ເປັນເອກະພາບຕໍ່ບັນດາການກຳນົດທິດໃຫຍ່ທີ່ມີລັກສະນະຍຸດທະສາດຍາວນານໃນການພັດທະນາການພົວພັນສອງປະເທດໃນສັງກາດໃໝ່.
