ຕອນບ່າຍວັນທີ 03 ກໍລະກົດ, ຢູ່ ຮ່າໂນ້ຍ, ທ່ານລັດຖະມົນຕີ, ຫົວໜ້າຫ້ອງວ່າການລັດຖະບານ ຫວຽດນາມ ເຈິ່ນວັນເຊີນ ໄດ້ເປັນປະທານ ກອງປະຊຸມຖະແຫຼງຂ່າວນັດສາມັນປະຈຳເດືອນ ມິຖຸນາ ຂອງລັດຖະບານ.
ທ່ານລັດຖະມົນຕີໃຫ້ຮູ້ວ່າ, ຕາມການຄາດຄະເນທ້າຍເດືອນ ພຶດສະພາ, ການເຕີບໂຕ GDP ໃນໄຕມາດທີ 2 ຄາດວ່າບັນລຸ 7,67% ເມື່ອທຽບໃສ່ໄລຍະດຽວກັນ; 6 ເດືອນຕົ້ນປີບັນລຸ 7,31%. ເຖິງຢ່າງໃດກໍ່ຕາມ, ຖ້າອັບເດດຕົວເລກຮອດວັນທີ 30 ມິຖຸນາ, ລະດັບເຕີບໂຕ GDP ໃນ 6 ເດືອນອາດຈະສູງກວ່າ 0,2 – 0,3% ເມື່ອທຽບໃສ່ການຄາດຄະເນ.
ເມື່ອແຈ້ງກ່ຽວກັບໝາກຜົນການຜັນຂະຫຍາຍລະບຽບການບໍລິຫານຮັບໃຊ້ປະຊາຊົນ ແລະ ວິສາຫະກິດ ພາຍຫຼັງເຄື່ອນໄຫວອຳນາດການປົກຄອງ 2 ຂັ້ນ, ທ່ານຮອງລັດຖະມົນຕີກະຊວງພາຍໃນ ຫວຽດນາມ ນາງ ຫງວຽນທິຮ່າ, ໃຫ້ຮູ້ວ່າ:
“ຈຳນວນລະບຽບການບໍລິຫານທັງໝົດພາຍຫຼັງການຈັດແບ່ງຂັ້ນ, ຈັດແບ່ງສິດ, ສິດອຳນາດຂັ້ນແຂວງແມ່ນ 1.261 ລະບຽບການບໍລິຫານ, ຂັ້ນຕາແສງ 463 ລະບຽບການບໍລິຫານ ແລະ ຍົກເລີກ 74 ລະບຽບການບໍລິຫານ. ໂດຍພື້ນຖານ ບັນດາລະບຽບການບໍລິຫານຮັບໃຊ້ປະຊາຊົນ ແລະ ວິສາຫະກິດໄດ້ປະກາດແຕ່ໄວ, ກຳນົດຢ່າງຈະແຈ້ງ, ລະອຽດ ແລະ ໄດ້ເຄື່ອນໄຫວໃນທັນທີ, ໄດ້ລຸລ່ວງໂດຍພື້ນຖານ ເມື່ອໄດ້ນຳເຂົ້າໃຊ້ການຢ່າງເປັນທາງການແຕ່ວັນທີ 01 ກໍລະກົດ 2025”.
