ທ່ານປະທານປະເທດ ຈີນ ສີຈິ້ນຜິງ ແລະ ທ່ານປະທານາທິບໍດີ ລັດເຊຍ Vladimir Putin ໄດ້ໂອ້ລົມທາງໂທລະສັບໃນຕອນບ່າຍວັນທີ 19 ມິຖຸນາ, ຈຸດສຸມແມ່ນປຶກສາຫາລືກ່ຽວກັບການປະທະກັນທີ່ເຄັ່ງຕຶງລະຫວ່າງ ອິດສະຣາແອັນ ແລະ ອີຣານ.
ທ່ານປະທານປະເທດ ຈີນ ສີຈິ້ນຜິງ ໄດ້ຍົກອອກ 4 ຂໍ້ສະເໜີເພື່ອແກ້ໄຂສະພາບການປະທະກັນໃນປະຈຸບັນ, ລວມມີ: ຊຸກຍູ້ການຢຸດຍິງ ແລະ ຢຸດຕິການປະທະກັນ, ຮັບປະກັບຄວາມປອດໄພໃຫ້ແກ່ສາມັນຊົນ, ດຳເນີນການເຈລະຈາ ແລະ ຄວາມມານະພະຍາຍາມຂອງປະຊາຄົມສາກົນໃນການຊຸກຍູ້ສັນຕິພາບ. ທ່ານເນັ້ນໜັກວ່າ, ບັນດາຝ່າຍປະທະກັນ, ພິເສດແມ່ນ ອິດສະຣາແອັນ, ຕ້ອງຢຸດຍິງຍິ່ງໄວກໍ່ຍິ່ງດີ ເພື່ອສະກັດກັ້ນສະພາບຄວາມເຄັ່ງຕຶງເພີ່ມຂຶ້ນ ແລະ ຫຼີກລ່ຽງເຮັດໃຫ້ສົງຄາມແຜ່ຂະຫຍາຍອອກກວ້າງ, ຮຽກຮ້ອງໃຫ້ບັນດາຝ່າຍຈົ່ງເຄົາລົບກົດໝາຍສາກົນຢ່າງເຂັ້ມງວດ, ຫຼີກລ່ຽງສະພາບກໍ່ຄວາມເສຍຫາຍໃຫ້ແກ່ສາມັນຊົນ ແລະ ສ້າງເງື່ອນໄຂໃຫ້ການຍົກຍ້າຍສາມັນຊົນຂອງປະເທດທີ 3.
ຕາມສຳນັກຂ່າວສານ ຊິນຮວາ ແລ້ວ, ທ່ານປະທານາທິບໍດີ ລັດເຊຍ Vladimir Putin ໃຫ້ຮູ້ວ່າ, ລັດເຊຍ ພ້ອມແລ້ວທີ່ຈະຮັກສາການຕິດຕໍ່ຢ່າງແໜ້ນແຟ້ນກັບ ຈີນ, ພ້ອມກັນ ຕັ້ງໜ້າຫຼຸດຜ່ອນສະພາບການ ແລະ ຮັກສາສັນຕິພາບ, ສະຖຽນລະພາບຢູ່ພາກພື້ນ.
