 |
ຕອນເຊົ້າວັນທີ 25 ມິຖຸນາ, ມີນັກຮົບກວ່າ 7.000 ຄົນຢູ່ 3 ສະຖານທີ່ຂຶ້ນກັບ ຮ່າໂນ້ຍ, ລວມມີ: ສູນຝຶກຊ້ອມດ້ານການທະຫານແຫ່ງຊາດ 4 ມຽວມົນ, ມະຫາວິທະຍາໄລແຫ່ງຊາດ ຮ່າໂນ້ຍ ແລະ ບ້ານວັດທະນະທຳ - ທ່ອງທ່ຽວບັນດາເຜົ່າ ຫວຽດນາມ ເຂົ້າຮ່ວມການຝຶກຊ້ອມຮ່ວມ ເພື່ອກະກຽມໃຫ້ພິທີເດີນສວນສະໜາມກ້ອນກຳລັງ, ເດີນຂະບວນ ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນປະຕິວັດເດືອນ ສິງຫາ (19 ສິງຫາ 1945 – 19 ສິງຫາ 2025) ແລະ ວັນຊາດ ຫວຽດນາມ (02 ກັນຍາ 1945 – 02 ກັນຍາ 2025).
ທີ່ການຝຶກຊ້ອມຮ່ວມ, ບັນດາກ້ອນກຳລັງເດີນສວນສະໜາມຢູ່ 3 ເຂດໄດ້ເຕົ້າໂຮມຝຶກຊ້ອມບັນດາເນື້ອໃນພື້ນຖານຕາມໝາກຜົນການຝຶກຊ້ອມໃນໄລຍະຜ່ານມາ, ເພື່ອສຳເລັດດ້ານເຕັກນິກ, ຍົກສູງລັກສະນະເປັນເອກະພາບ ແລະ ຊັດເຈນໃນແຕ່ລະກຸ່ມກ້ອນ, ກະກຽມໃຫ້ການຝືກຊ້ອມຮ່ວມຄັ້ງຕໍ່ໄປໃຫ້ເປັນຢ່າງດີ. ເມື່ອທຽບໃສ່ບັນດາການເດີນສວນສະໜາມກ້ອນກຳລັງ, ເດີນຂະບວນເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນໄຊຊະນະ ດ້ຽນບຽນຝູ ແລະ ສະເຫຼີມສະຫຼອງ 50 ປີແຫ່ງວັນທ້ອນໂຮມປະເທດຊາດເປັນເອກະພາບ, ຈຳນວນກຸ່ມທະຫານ ແລະ ພະນັກງານ, ນັກຮົບເຂົ້າຮ່ວມໃນຄັ້ງນີ້ໄດ້ເພີ່ມຂຶ້ນຕື່ມ. ໃນນັ້ນ, ກອງທັບມີ 38 ກຸ່ມກ້ອນ ດ້ວຍພະນັກງານ, ນັກຮົບກວ່າ 7.400 ຄົນ.
ໂດຍເປັນປະທານການກວດກາການຝຶກຊ້ອມ, ທ່ານພົນຈັດຕະວາ ຫວູຫວຽດຮຸ່ງ, ຫົວໜ້າກົມອົບຮົມຝຶກຊ້ອມການທະຫານ - ໂຮງຮຽນ (ກົມໃຫຍ່ເສນາທິການ ກອງທັບປະຊາຊົນ ຫວຽດນາມ), ຮອງຫົວໜ້າອະນຸກຳມະການ ການເດີນສວນສະໜາມກ້ອນກຳລັງ, ເດີນຂະບວນ ໃຫ້ຮູ້ວ່າ, ພາຍຫຼັງການຝຶກຊ້ອມເປັນເວລາເກືອບ 20 ວັນ, ນີ້ເປັນຄັ້ງທຳອິດທີ່ບັນດາກຸ່ມກ້ອນເດີນສວນສະໜາມ, ເດີນຂະບວນ ໂດຍກະຊວງປ້ອງກັນປະເທດໄດ້ຝຶກຊ້ອມຮ່ວມ. ເລື່ອງຈັດການຝຶກຊ້ອມຮ່ວມແມ່ນເພື່ອແນໃສ່ກະກຽມຢ່າງລະອຽດລະອໍໃຫ້ພິທີເດີນສວນສະໜາມກ້ອນກຳລັງ, ເດີນຂະບວນທີ່ມີຂອບຂະໜາດໃຫຍ່ໃນໄລຍະຈະມາເຖິງ.
