 ທ່ານ ເລືອງເກື່ອງ ປະທານປະເທດ ຫວຽດນາມ ກ່າວຄຳເຫັນທີ່ການພົບປະ |
ຕອນບ່າຍວັນທີ 22 ກັນຍາ, ຕາມເວລາທ້ອງຖິ່ນ, ທ່ານ ເລືອງເກື່ອງ ປະທານປະເທດ ຫວຽດນາມ ໄດ້ມີການພົບປະກັບບັນດານັກຮົບເກົ່າ ຫວຽດນາມ - ອາເມລິກາ ເນື່ອງໃນໂອກາດໄປປະຕິບັດງານຢູ່ນະຄອນ ນິວຢອກ, ເຂົ້າຮ່ວມວາລະປຶກສາຫາລືລວມຂັ້ນສູງຂອງສະມັດຊາໃຫຍ່ ສປຊ ຊຸດທີ 80, ສົມທົບກັບການເຄື່ອນໄຫວສອງຝ່າຍຢູ່ ອາເມລິກາ. ນະທີ່ນີ້, ທ່ານ ເລືອງເກື່ອງ ປະທານປະເທດ ຫວຽດນາມ ໃຫ້ຮູ້ວ່າ ປະຊາຊົນ ຫວຽດນາມ ເລືອກໂຈະອະດີດຕະການອັນເຈັບປວດໄວ້ ເພື່ອມຸ່ງໄປເຖິງອະນາຄົດ; ເລືອກໃຫ້ອະໄພ, ແຕ່ບໍ່ຫຼົງລືມ; ເຊື່ອໝັ້ນຕໍ່ຄົນລຸ້ນຫຼັງຂອງ ຫວຽດນາມ ແລະ ອາເມລິກາ ຈະພ້ອມກັນເພີ່ມພູນຄູນສ້າງສັງກາດແຫ່ງສັນຕິພາບ, ຮ່ວມມື, ພັດທະນາ ແລະ ເຄົາລົບເຊິ່ງກັນ ແລະ ກັນ. ຢັ້ງຢືນ ຫວຽດນາມ ແລະ ອາເມລິກາ ໄດ້ ແລະ ພວມຮ່ວມແຮງຮ່ວມໃຈສ້າງອະນາຄົດອັນສົດໃສໃຫ້ແກ່ສອງປະເທດ, ທ່ານ ເລືອງເກື່ອງ ເນັ້ນໜັກວ່າ ເລື່ອງລາວຮຳບາດແຜ, ສ້າງຄວາມປອງດອງລະຫວ່າງ ຫວຽດນາມ ແລະ ອາເມລິກາ ແມ່ນພະຍານຫຼັກຖານທີ່ມີຊີວິດຊີວາສະແດງໃຫ້ເຫັນກຳລັງແຮງຂອງນ້ຳໃຈໂອບອ້ອມອາລີສາມາດຍິ່ງໃຫຍ່ເຖິງຂັ້ນໃດ ແລະ ສາມາດບຸກທະລຸຂໍ້ຈຳກັດຄືແນວໃດ. ທ່ານປະທານປະເທດ ຫວຽດນາມ ປາດຖະໜາວ່າ ບັນດານັກຮົບເກົ່າ ຫວຽດນາມ, ບັນດານັກຮົບເກົ່າ ອາເມລິກາ ດ້ວຍນ້ຳໃຈອັນກວ້າງໃຫຍ່ ແລະ ນ້ຳໃຈເພື່ອນມິດ, ຈະສືບຕໍ່ສະໜັບສະໜູນສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອາເມລິກາ ໃຫ້ມີສະຖຽນລະພາບ, ນັບມື້ນັບພັດທະນາຢ່າງຕັ້ງໜ້າ ແລະ ດີງາມກວ່າເກົ່າ.
ກໍໃນການພົບປະນີ້, ບັນດານັກຮົບເກົ່າ ຫວຽດນາມ ແລະ ອາເມລິກາ ໄດ້ແບ່ງປັນກ່ຽວກັບບັນດາເລື່ອງລາວອະດີດຕະການຈາກສອງຝ່າຍ, ວິວັດທະນາການຮຳບາດແຜສົງຄາມ ແລະ ບັນດາຄວາມປາດຖະໜາຢາກໂຈະ, ເຄົາລົບອະດີດຕະການ ແລະ ມຸ່ງໄປເຖິງອະນາຄົດອັນດີງາມລະຫວ່າງສອງປະເທດ.
