 ທ່ານຮອງລັດຖະມົນຕີກະຊວງການເງິນ ໂດະແທ່ງຈູງ (ພາບ: VGP) |
ໃນການຖະແຫຼງຂ່າວນັດສາມັນຂອງລັດຖະບານ ຫວຽດນາມ ທີ່ໄດ້ດຳເນີນໃນຕອນບ່າຍວັນທີ 4 ມິຖູນາ ຢູ່ຮ່າໂນ້ຍ, ທ່ານຮອງລັດຖະມົນຕີກະຊວງການເງິນ ໂດະແທ່ງຈູງ ໄດ້ແຈ້ງໃຫ້ຊາບກ່ຽວກັບອັດຕາການເບີກຈ່າຍງົບປະມານລົງທຶນພາກລັດ ກໍຄືບັນດາມາດຕະການໃນໄລຍະຈະມາເຖິງ. ຕາມກະຊວງການເງິນແລ້ວ, ການເບີກຈ່າຍງົບປະມານລົງທຶນພາກລັດ ໄດ້ເພີ່ມຂຶ້ນຢ່າງຈະແຈ້ງ; ຄາດວ່າ ໄລ່ຮອດທ້າຍເດືອນ ພຶດສະພາ ແມ່ນເບີກຈ່າຍໄດ້ກວ່າ 199.000 ຕື້ດົ່ງ (ກວ່າ 8,6 ຕື້ USD), ບັນລຸກວ່າ 24% ແຜນການທີ່ທ່ານນາຍົກລັດຖະມົນຕີໄດ້ມອບໝາຍໃຫ້.
ກ່ຽວກັບມາດຕະການເພື່ອປະຕິບັດສຳເລັດເປົ້າໝາຍເບີກຈ່າຍງົບປະມານລົງທຶນພາກລັດບັນລຸ 100% ນັ້ນ, ທ່ານຮອງລັດຖະມົນຕີກະຊວງການເງິນ ໂດະແທ່ງຈູງ ໃຫ້ຮູ້ວ່າ ທາງກະຊວງ ຈະສຸມໃສ່ແກ້ໄຂກ່ຽວກັບລະບອບລະບຽບການ, ຫັນລະບຽບການໃຫ້ເປັນງ່າຍດາຍ, ພິເສດແມ່ນໃນບັນດາຂອດສ້າງ, ກວດກາຢັ້ງຢືນ, ອະນຸມັດຜ່ານ ແລະ ຊຳລະບັນດາໂຄງການລົງທຶນພາກລັດ.
ພ້ອມດຽວກັນນັ້ນ, ກະຊວງການເງິນ ກໍຮັບປະກັນວຽກງານດັດປັບແຜນຜັງ, ບໍລິຫານ ແລະ ການຈັດແບ່ງທຶນໃຫ້ທັນການ ເພື່ອຕອບສະໜອງຂອງຄວາມຕ້ອງການຂອງບັນດາໂຄງການ.
