 ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ແລະ ທ່ານປະທານສະພາແຫ່ງຊາດ ນິວຊີແລັນ Gerry Brownlee (ພາບ: VOV) |
ການນຳສອງທ່ານໄດ້ເຫັນດີເປັນເອກະພາບເຮັດໃຫ້ການພົວພັນຮ່ວມມືຫວຽດນາມ - ນິວຊີແລັນ ເລິກເຊິ່ງກວ່າອີກໃນທຸກຂົງເຂດຄື: ການເມືອງ, ການທູດ, ແລກປ່ຽນຄະນະຜູ້ແທນ ແລະ ການພົບປະຂັ້ນສູງ, ຮັກສາບັນດາກົນໄກຮ່ວມມືສອງຝ່າຍ, ວາງອອກຍຸດທະສາດເຊື່ອມຕໍ່ສອງພື້ນຖານເສດຖະກິດໂດຍໄວ, ຊູກຍູ້ການລົງນາມບັນດາຂໍ້ຕົກລົງຮ່ວມມືກ່ຽວກັບເສດຖະກິດ, ການຄ້າ ແລະ ການລົງທຶນ, ສ້າງຄວາມສະດວກໃຫ້ການເປີດປະຕູຕະຫຼາດຕໍ່ບັນດາຜະລິດຕະພັນກະເສດຂອງກັນ, ມຸ່ງໄປເຖິງເປົ້າໝາຍຫັນລະບົບສະໜອງເປັນຫຼາຍຮູບຫຼາຍແບບ. ພ້ອມກັນນັ້ນ, ຜັນຂະຫຍາຍບັນດາຂົງເຂດໃໝ່ຄື: ເສດຖະກິດສີຂຽວ, ເສດຖະກິດດີຈີຕອນ, ການຫັນເປັນດີຈີຕອນ, ວິທະຍາສາດເຕັກໂນໂລຢີ ແລະ ນະວັດຕະກຳ, ການຮັບມືກັບການປ່ຽນແປງຂອງດິນຟ້າອາກາດ, ສືບຕໍ່ຍູ້ແຮງການຮ່ວມມືດ້ານປ້ອງກັນຊາດ -ປ້ອງກັນຄວາມສະຫງົບ ແລະ ໃນບັນດາການເຄື່ອນໄຫວຮັກສາສັນຕິພາບ ຂອງສປຊ. ສອງຝ່າຍກໍ່ເຫັນດີເປັນເອກະພາບເພີ່ມທະວີການຮ່ວມມືດ້ານການສຶກສາ, ບຳລຸງສ້າງ, ພິຈາລະນາເປີດເສັ້ນທາງໂດຍກົງເຊື່ອມຕໍ່ສອງປະເທດເພື່ອແນໃສ່ຊຸກຍູ້ການພົບປະແລກປ່ຽນປະຊາຊົນ ແລະ ການຮ່ວມມືເສດຖະກິດ, ການຄ້າ ກໍ່ຄືການຮ່ວມມືລະຫວ່າງບັນດາທ້ອງຖິ່ນ, ສ້າງຄວາມສະດວກໃຫ້ແກ່ບັນດາວິສາຫະກິດສອງປະເທດຊອກຫາໂອກາດດຳເນີນທຸລະກິດ ແລະ ລົງທຶນ. ຕີລາຄາກ່ຽວກັບຖານະບົດບາດ ແລະ ທີ່ຕັ້ງຂອງ ຫວຽດນາມ, ທ່ານປະທານສະພາແຫ່ງຊາດ ນິວຊີແລັນ ຢັ້ງຢືນວ່າ ຫວຽດນາມແມ່ນຄູ່ຮ່ວມມືສຳຄັນ, ລັດຖະບານ ແລະ ສະພາແຫ່ງຊາດ ນິວຊີແລັນ ໃຫ້ບຸລິມະສິດເພີ່ມທະວີການພົວພັນກັບຫວຽດນາມ ໃນນະໂຍບາຍການຕ່າງປະເທດສັງລວມຂອງ ນິວຊີແລັນ ຢູ່ພາກພື້ນ, ທ່ານໃຫ້ຮູ້ວ່າ ສະພາແຫ່ງຊາດ ນິວຊີແລັນ ໃຫ້ຄຳໝັ້ນສັນຍາ ສະໜັບສະໜູນການຊຸກຍູ້ການຮ່ວມມືກັບ ຫວຽດນາມ ໃນທຸກຂົງເຂດ.
