 ທ່ານ Narendra Modi ນາຍົກລັດຖະມົນຕີປະເທດອິນເດຍ (ພາບ: ANI/TTXVN) |
ວັນທີ 6 ສິງຫາ, ແຫຼ່ງຂ່າວຈາກລັດຖະບານ ອິນເດຍໂດຍໃຫ້ຮູ້ວ່າ ທ່ານ Narendra Modi ນາຍົກລັດຖະມົນຕີປະເທດອິນເດຍ ຈະໄປຢ້ຽມຢາມ ຈີນເປັນຄັ້ງທຳອິດ ພາຍຫຼັງເວລາກ່ວາ 7 ປີ. ນີ້ແມ່ນສັນຍານຫຼ້າສຸດສະແດງໃຫ້ເຫັນການພົວພັນທາງການທູດ ລະຫວ່າງ ອິນເດຍ ແລະ ຈີນພວມດີຂຶ້ນ. ທ່ານ Narendra Modi ຈະເດີນທາງໄປຍັງຈີນເຂົ້າຮ່ວມກອງປະຊຸມຫຼາຍຝ່າຍ ຂອງອົງການຮ່ວມມືຊຽງໄຮ (SCO) ທີ່ຈະໄຂຂຶ້ນໃນວັນທີ 31 ສິງຫາ ຢູ່ນະຄອນ ທຽນຈິນ. ນີ້ແມ່ນການຢ້ຽມຢາມ ຈີນ ຄັ້ງທຳອິດຂອງທ່ານ Narendra Modi ນັບແຕ່ເດືອນມິຖຸນາ 2018, ພາຍຫຼັງໄລຍະຍາວນານທີ່ການພົວພັນສອງປະເທດຕົກເຂົ້າສູ່ສະພາບການວິກິດການ ໂດຍການປະທະກັນທາງການທະຫານລຽບຕາມຊາຍແດນເຂດທີ່ຂັດແຍ້ງກັນຢູ່ Himalaya ທີ່ເກີດຂຶ້ນເມື່ອປີ 2020. ກ່ອນໜ້ານັ້ນ, ທ່ານ Modi ແລະ ທ່ານປະທານປະເທດຈີນ ສີຈິ້ນຜິງ ກໍ່ໄດ້ພົບປະເຈລະຈາຢູ່ນອກກອງປະຊຸມສຸດຍອດກຸ່ມ BRICS ຢູ່ລັດເຊຍໃນເດືອນຕຸລາ ປີ 2024, ເຊິ່ງໄດ້ເຮັດໃຫ້ການພົວພັນສອງປະເທດດີຂຶ້ນ.
