 ວັດເດັຍຕ້າງຟີລາຍ ຢູ່ແຂວງຮ່ານາມ |
ຮ່ານາມ ຫ່າງຈາກນະຄອນຫຼວງ ຮ່າໂນ້ຍ ໄປທາງທິດໃຕ້ປະມານ 65 ກິໂລແມັດ. ນີ້ແມ່ນດິນແດນທີ່ເຕັມໄປດ້ວຍຄວາມສາມາດບົ່ມຊ້ອນພັດທະນາການທ່ອງທ່ຽວຈິດວິນຍານ, ວັດທະນະທຳ, ທ່ອງທ່ຽວທຳມະຊາດ ແລະ ອາຫານການກິນ. ບັນດາສະຖານທີ່ທ່ອງທ່ຽວທີ່ດຶງດູດແຂກທ່ອງທ່ຽວຢ່າງຫຼວງຫຼາຍຄື ກຸ່ມວັດຕາມຈຸກ, ວັດເດັຍຕ້າງຟີລາຍ, ວັດບ່າແດັງ, ວັດເຈິ່ນເທືອງ… ບັນດາໝູ່ບ້ານອາຊີບທີ່ມີຊື່ສຽງຄື ໝູ່ບ້ານແພໄໝຍາສາ, ໝູ່ບ້ານເຮັດເຄື່ອງຈັກສານຫງອກດົ້ງ… ດ້ວຍທ່າແຮງຫຼາຍຢ່າງເຊັ່ນນັ້ນ ທ່ານນາງ ເລທິຖຸ໋ຍ ເລຂາຄະນະພັກແຂວງ ຮ່ານາມ ຢືນຢັນວ່າ:
“ຮ່ານາມ ໄດ້ຮັບການເຊີດຊູ ແມ່ນສະຖານທີ່ທ່ອງທ່ຽວທີ່ຫາກໍ່ພົນເດັ່ນແຖວໜ້າອາຊີ, ສະຖານທີ່ວັດທະນະທຳທ້ອງຖິ່ນແຖວໜ້າໂລກ. ສິ່ງນີ້ໄດ້ສະແດງໃຫ້ເຫັນວ່າ ຮ່ານາມ ແມ່ນໜຶ່ງໃນບັນດາທ້ອງຖິ່ນທີ່ມີລະດັບການພັດທະນາໄວ ມີທ່າແຮງບົມຊ້ອນ ເພື່ອພັດທະນາການທ່ອງທ່ຽວ”.
ພ້ອມກັບບັນດາປະເພດທ່ອງທ່ຽວຈິດວິນຍານພວມມີທ່າແຮງຂອງງແຂວງ, ຮ່ານາມ ພວມເອົາໃຈໃສ່ພັດທະນາຮູບແບບທ່ອງທ່ຽວຊົນນະບົດ ໂດຍອີງໃສ່ພື້ນຖານຂູດຄົ້ນຄຸນຄ່າວັດທະນະທຳພື້ນເມືອງ ແລະ ສະພາບແວດລ້ອມທັດຊະນີຍະພາບຢູ່ທ້ອງຖິ່ນຢ່າງມີປະສິດທິຜົນ. ທ່ານ ເຈືອງກວັກຮຸຍ ຮອງເລຂາຄະນະພັກ ປະທານຄະນະກຳມະການປະຊາຊົນແຂວງ ຮ່ານາມ ໃຫ້ຮູ້ວ່າ:
“ພວກຂ້າພະເຈົ້າພວມສຸມໃສ່ພັດທະນາການທ່ອງທ່ຽວຈິດວິນຍານ ແຕ່ເພື່ອດຶງດູດນັກທ່ອງທ່ຽວມາທ່ຽວຢູ່ແຂວງ ຮ່ານາມ ໃຫ້ຫຼາຍຂຶ້ນນັ້ນ ກໍ່ຕ້ອງມີຫຼາຍຜະລິດຕະພັນທ່ອງທ່ຽວ ໃນນັ້ນມີທ່ອງທ່ຽວກະສິກກຳ ທາງແຂວງພວມສຸມໃສ່ລົງທຶນ”.
ເພື່ອເສີມຂະຫຍາຍເຄື່ອງໝາຍສະຖານທີ່ວັດທະນະທຳທ້ອງຖິ່ນແຖວໜ້າໂລກນັ້ນ ແຂວງ ຮ່ານາມ ໄດ້ຍູ້ແຮງດຶງດູດນັກລົງທຶນໃຫຍ່ເຊິ່ງໂຄງການ Sun Urban City ຂອງກຸ່ມບໍລິສັດ SunGroup ຫາກໍ່ເລີ່ມລົງມືກໍ່ສ້າງຢູ່ນະຄອນ ຝູຫຼີ ກໍ່ແມ່ນຫຼັກຖານອັນໜຶ່ງ. ໂຄງການນີ້ໝັ້ນໝາຍຈະເຮັດໃຫ້ໂສມໜ້າຕົວເມືອງປ່ຽນແປງໄປ, ເຊື່ອມຕໍ່ລະຫວ່າງເຂດ ແລະ ສ້າງຄວາມດູດດື່ມໃໝ່ໃຫ້ຂະແໜງທ່ອງທ່ຽວ ຮ່ານາມ. ທ່ານ ຮຸຍໃຫ້ຮູ້ຕື່ມອີກວ່າ:
“ພວກຂ້າພະເຈົ້າເອົາໃຈໃສ່ເຊື້ອເຊີນບັນດານັກລົງທຶນໃຫຍ່ເຂົ້າມາລົງທຶນຢູ່ແຂວງ ສ້າງໃຫ້ມີຫຼາຍຜະລິດຕະພນທ່ອງທ່ຽວ, ຜູກມັດບັນດາຜະລິດຕະພັນທ່ອງທ່ຽວນຳກັນຢ່າງແໜ້ນແຟ້ນ ເພື່ອເຮັດແນວໃດດຶງດູດແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ”.
ແຂວງ ຮ່ານາມ ພວມວາງເປົ້າໝາຍດຶງດູດນັກລົງທຶນໃຫຍ່. ນອກຈາກ SunGroup, ລັດຖະບານກໍ່ຫາອະນຸມັດຜ່ານແຜນນະໂຍບາຍລົງທຶນໂຄງການເຂດອຸດສາຫະກຳ ດົ່ງວັນ 6 ອັນໄດ້ສ້າງຄວາມດູດດື່ມໃຫ້ແກ່ ຮ່ານາມ ແລະ ສ້າງເງື່ອນໄຂສະດວກໃຫ້ແກ່ການເຊື່ອມຕໍ່ພັດທະນາຜະລິດຕະພັນທ່ອງທ່ຽວລະຫວ່າງເຂດ. ຕໍ່ໜ້າໂອກາດກ້າວກະໂດດຂັ້ນຢ່າງໃຫຍ່ຫຼວງຂອງແຂວງ ຮ່ານາມ, ທ່ານຮອງຫົວໜ້າກົມທ່ອງທ່ຽວແຫ່ງຊາດ ຫວຽດນາມ ຫງວຽນເລ໊ຟຸກ ຖືວ່າ:
“ຮ່ານາມ ຄວນຍູ້ແຮງການນຳໃຊ້ບັນດາເຄື່ອງມືໂຄສະນາທັນສະໄໝ ແລະ ໝູນໃຊ້ເຕັກໂນໂລຊີດີຈີຕອນ ເພື່ອເຊື່ອມຕໍ່ ແລະ ໂຄສະນາພາບພົດການທ່ອງທ່ຽວຂອງທ້ອງຖິ່ນອອກສູ່ໂລກພາຍນອກ. ທີສອງ ແມ່ນສົ່ງເສີມການລົງທຶນ ກໍ່ສ້າງໂຄງລ່າງພື້ນຖານການທ່ອງທ່ຽວ, ຈາກລະບົບໂຮງແຮມພັດຕະຄານ ຕະຮອດເຂດບັນເທີງ, ອະນຸລັກເສີມຂະຫຍາຍບັນດາຄຸນຄ່າວັດທະນະທຳພື້ນເມືອງ”.
ໃນ 9 ເດືອນຕົ້ນປີນີ້, ຮ່ານາມ ໄດ້ຕ້ອນຮັບແຂກທ່ອງທ່ຽວປະມານ 4,3 ລ້ານຄົນ ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດສັງຄົມຂອງແຂວງ ສ້າງກໍ່ລັງໜູນຊຸກຍູ້ພັດທະນາຂອງຫຼາຍຂະແໜງການຂົງເຂດທີ່ແຕກຕ່າງກັນ. ແຂວງ ຮ່ານາມ ພວມວາງເປົ້າໝາຍເຖິງປີ 2030 ຈະຕ້ອນຮັບແຂກທ່ອງທ່ຽວ 10 ລ້ານເທື່ອຄົນ ແລະ ສຳຄັນແມ່ນແຂວງ ຮ່ານາມ ກາຍເປັນສະຖານທີ່ທ່ອງທ່ຽວ ເຊິ່ງແຂກທ່ອງທ່ຽວທັງຢູ່ພາຍໃນ ແລະ ສາກົນບໍ່ອາດພາດໂອກາດແວ່ຢາມເມື່ອມາຮອດ ຫວຽດນາມ.
