 (ຄະນະປະຕິບັດງານໄປຢ້ຽມຢາມ, ອວຍພອນ ແລະ ມອບຂອງຂວັນຢູ່ສູນຝຶກແອບເຄື່ອນທີ່ ໄຕບັກ) |
ໃນຊຸມມື້ໃກ້ຈະຮອດບຸນເຕັດ, ຢູ່ຫຼາຍແຫ່ງຂອງເຂດ ໄຕບັກ, ບັນຍາກາດຂອງລະດູບານໃໝ່ໄດ້ເລີ່ມວຽນມາຢູ່ເຂດຊາຍແດນ ເຊີນລາ ໃນສີຂຽວຂອງເສື້ອບັນດາທະຫານ ແລະ ຖ້ຽວລົດແຫ່ງສາຍໃຈຄວາມຮັກແພງຂ້າມພູ, ຂ້າມກິ່ວ. ຢູ່ 2 ຕາແສງເຂດຊາຍແດນ ຈ່ຽງເຊີນ ແລະ ລອງເຊີບ, ລະດູບານໃໝ່ປີນີ້ໄດ້ວຽນມາໄວກວ່າ ໂດຍຜ່ານການແບ່ງປັນ, ດ້ວຍຄວາມອົບອຸ່ນຂອງນ້ຳໃຈເພື່ອນຮ່ວມກົມກອງ, ນ້ຳໃຈທະຫານ ແລະ ປະຊາຊົນທີ່ສະໜິດແໜ້ນ. ປີ 2026, ວິທະຍາຄານວິທະຍາສາດການທະຫານ ໄດ້ເປັນປະທານ ແລະ ຮ່ວມເດີນທາງພ້ອມກັບ 12 ຫົວໜ່ວຍ, ໃນນັ້ນມີພະແນກກະຈາຍສຽງບັນດາລາຍການພາກພາສາຕ່າງປະເທດ (VOV5), ວິທະຍຸກະຈາຍສຽງ ຫວຽດນາມ ຈັດລາຍການ “ລະດູບານໃໝ່ຢູ່ເຂດຊາຍແດນ”. ແຕ່ລະຫົວໜ່ວຍ, ນ້ຳໃຈແຕ່ລະຄົນໄດ້ປະກອບສ່ວນສ້າງກຳລັງແຜ່ກະຈາຍໄປທົ່ວໃຫ້ແກ່ລາຍການທີ່ເຕັມໄປດ້ວຍຄຸນຄ່າວັດທະນະທຳມະນຸດ.
ໃນຂອບເຂດຂອງລາຍການ “ລະດູບານໃໝ່ເຂດຊາຍແດນ” ປີ 2026, ຄະນະປະຕິບັດງານໂດຍ ທ່ານພົນຈັດຕະວາ ຫງວຽນດິ່ງຈຸງ, ຜູ້ຮັບຜິດຊອບດ້ານການເມືອງ ວິທະຍາຄານວິທະຍາສາດການທະຫານ ເປັນຫົວໜ້າຄະນະ, ໂດຍໄດ້ໄປຢ້ຽມຢາມ, ອວຍພອນ ແລະ ມອບຂອງຂວັນຢູ່ສູນຝຶກແອບເຄື່ອນທີ່ ໄຕບັກ, ປ້ອມປ້ອງກັນຊາຍແດນ ຈ່ຽງເຊີນ, ປ້ອມປ້ອງກັນຊາຍແດນດ່ານຊາຍແດນ ລອງເຊີບ. ພິເສດ, ທາງຄະນະໄດ້ສະຫງວນຄວາມເອົາໃຈໃສ່ຢ່າງເລິກເຊິ່ງເມື່ອໄປຢ້ຽມຢາມ, ມອບຂອງຂວັນໃຫ້ແກ່ 4 ຄອບຄົວທີ່ປະສົບກັບຄວາມຫຍຸ້ງຍາກເປັນພິເສດໃນບໍລິເວນ 2 ຕາແສງເຂດຊາຍແດນ.
ແບ່ງປັນທີ່ລາຍການ, ທ່ານພົນຈັດຕະວາ ຫງວຽນດິ່ງຈຸງ, ເນັ້ນໜັກວ່າ:
“ແຕ່ລະປີ, ແຕ່ລະສະຖານທີ່ເຊິ່ງລາຍການ “ລະດູບານໃໝ່ເຂດຊາຍແດນ” ໄປນັ້ນ ໄດ້ເປັນການປະກອບສ່ວນຮ່ວມແຮງຮ່ວມໃຈກັບຄະນະພັກ, ອຳນາດການປົກຄອງ, ກຳລັງປະກອບອາວຸດທ້ອງຖິ່ນໜູນຊ່ວຍ, ຊ່ວຍເຫຼືອບັນດາຄອບຄົວນະໂຍບາຍ, ພໍ່ແມ່ປະຊາຊົນ, ນັກຮົບ ແລະ ເດັກນ້ອຍເຂດພູສູງ, ຊາຍແດນ ເພື່ອປະກອບສ່ວນຫຼຸດຜ່ອນຄວາມຫຍຸ້ງຍາກໄດ້ສ່ວນໃດສ່ວນໜຶ່ງ, ດ້ວຍຈິດໃຈ ຜູ້ໃດກໍ່ໄດ້ຕ້ອນຮັບບຸນເຕັດ”.
“ລະດູບານໃໝ່ຢູ່ເຂດຊາຍແດນ” ແມ່ນການເຄື່ອນໄຫວປະຈຳປີ, ສະແດງໃຫ້ເຫັນນ້ຳໃຈອຸ້ມຊູຊ່ວຍເຫຼືອເຊິ່ງກັນແລະກັນ, ໜ້າທີ່ຄວາມຮັບຜິດຊອບທາງສັງຄົມຂອງພະນັກງານ, ຄູອາຈານ, ສຳມະນາກອນ ແລະ ບັນດາຫົວໜ່ວຍຮ່ວມເດີນທາງຕໍ່ກັບພໍ່ແມ່ປະຊາຊົນ, ນັກຮົບຢູ່ເຂດຊາຍແດນຂອງປະເທດຊາດ. ຈາກຄວາມສະໝັກໃຈປະກອບສ່ວນດ້ວຍເງິນສົດ ແລະ ວັດຖຸສິ່ງຂອງ, ລາຍການປີນີ້ລະດົມແຫຼ່ງກຳລັງໄດ້ເກືອບ 1,4 ຕື້ດົ່ງ (53.100 USD), ສະຫງວນໃຫ້ບັນດາຫົວໜ່ວຍ, ທ້ອງຖິ່ນ, ຄອບຄົວທຸກຍາກ ແລະ ນັກຮຽນໃນໂຄງການ “ຊ່ວຍນ້ອງໄປໂຮງຮຽນ - ລູກລ້ຽງປ້ອມປ້ອງກັນຊາຍແດນ”. ຂອງຂວັນເກືອບ 800 ພູດທີ່ໄດ້ມອບນັ້ນ ບໍ່ພຽງແຕ່ມີຄຸນຄ່າທາງດ້ານວັດຖຸເທົ່ານັ້ນ, ຫາກຍັງແມ່ນການແບ່ງປັນ, ແມ່ນຄວາມເຊື່ອໝັ້ນ ແລະ ຄວາມຫວັງ. ສຳລັບບັນດາຄອບຄົວທີ່ຍັງປະສົບກັບຄວາມຫຍຸ້ງຍາກຫຼາຍຢ່າງນັ້ນ, ນີ້ແມ່ນບຸນເຕັດທີ່ຄົບຖ້ວນກວ່າ.
ຜ່ານການຈັດຕັ້ງເປັນເວລາ 11 ປີ, ລາຍການ “ລະດູບານໃໝ່ເຂດຊາຍແດນ” ໄດ້ກາຍເປັນຂົວເຊື່ອມຕໍ່ຢ່າງສະໜິດແໜ້ນລະຫວ່າງທະຫານກັບປະຊາຊົນ. ທ່ານ ເລຈ້ອງບິ່ງ, ປະທານຄະນະກຳມະການປະຊາຊົນຕາແສງ ຈ່ຽງເຊີນ, ແຂວງ ເຊີນລາ, ແບ່ງປັນວ່າ:
“ຂອງຂວັນແຕ່ລະພູດທີ່ຄະນະປະຕິບັດງານມອບໃຫ້ບັນດາຄອບຄົວທຸກຍາກ, ຄອບຄົວໃກ້ຂັ້ນທຸກຍາກ, ຄອບຄົວເປົ້າໝາຍນະໂຍບາຍ ນັ້ນ ໄດ້ປະກອບສ່ວນຊ່ວຍໃຫ້ຊາວທ້ອງຖິ່ນມີເງື່ອນໄຂຕ້ອນຮັບລະດູບານໃໝ່, ຕ້ອນຮັບບຸນເຕັດທີ່ອົບອຸ່ນກວ່າ. ພ້ອມກັນນັ້ນ, ກໍ່ເປັນການຕໍ່ຄວາມເຊື່ອໝັ້ນ, ມານະຈິດຕື່ມອີກເພື່ອໃຫ້ແຕ່ລະຄົນບືນຕົວຂຶ້ນໃນຊີວິດ, ມານະພະຍາຍາມຮ່ຳຮຽນ, ອອກແຮງງານ, ພ້ອມກັນຮ່ວມແຮງຮ່ວມໃຈສ້າງກຳບັງຂອງປະເທດຊາດ ໃຫ້ນັບມື້ນັບພັດທະນາ”.
 (ຄະນະປະຕິບັດງານມອບຂອງຂວັນໃຫ້ນັກຮຽນໃນໂຄງການ “ຊ່ວຍນ້ອງໄປໂຮງຮຽນ - ລູກລ້ຽງປ້ອມປ້ອງກັນຊາຍແດນ”) |
ໂດຍສົ່ງຄຳຕອບບຸນແທນຄຸນຕໍ່ຄະນະປະຕິບັດງານ, ປ້າ ຮວ່າງທິຮົມ, ແມ່ຂອງລູກລ້ຽງຜູ້ໜຶ່ງຂອງປ້ອມປ້ອງກັນຊາຍແດນ ລອງເຊີບ ແລະ ນ້ອງ ຮ່າດຶກກວ່ຽນ, ຢູ່ໂຮງຮຽນມັດທະຍົມຕອນປາຍ ຈ່ຽງເຊີນ, ແຂວງ ເຊີນລາ, ແບ່ງປັນວ່າ:
“ທະຫານໄດ້ເບິ່ງແຍງດູແລການຢູ່ການກິນ, ໂສ້ງເສື້ອ, ບ່ອນຢູ່ບ່ອນນອນ. ບັນດາລຸງ, ບັນດາອາວທະຫານໄດ້ຊ່ວຍເຫຼືອ, ທາງຄອບຄົວຂໍຂອບໃຈຫຼາຍໆ”.
“ນ້ອງມີຄວາມຕື້ນຕັນໃຈເມື່ອໄດ້ຮັບຂອງຂວັນຈາກບັນດາລຸງ, ບັນດາອາວມອບໃຫ້ພວກນ້ອງ. ພວກນ້ອງມີຄວາມພາກພູມໃຈທີ່ສຸດເມື່ອໄດ້ພົບປະກັບບັນດາລຸງ, ບັນດາອາວ. ຂອງຂວັນເຫຼົ່ານີ້ບໍ່ພຽງແຕ່ສ້າງຄວາມອົບອຸ່ນທາງດ້ານຮ່າງກາຍເທົ່ານັ້ນ, ຫາກຍັງເຮັດໃຫ້ຫົວໃຈອົບອຸ່ນອີກດ້ວຍ”.
ຢູ່ທ່າມກາງເຂດພູຜາປ່າໄມ້ເຂດ ໄຕບັກ, ລະດູບານໃໝ່ບໍ່ພຽງແຕ່ມາຈາກຈູມດອກຄາຍທີ່ພວມເບັ່ງບານ ຫຼືສຽງແຄນເອີ້ນໝູ່ເພື່ອນເທົ່ານັ້ນ, ຫາກຍັງມາຈາກບັນດານ້ຳໃຈຂອງການແບ່ງປັນອີກດ້ວຍ. ລະດູບານໃໝ່ເຂດຊາຍແດນ 2026 ຄັ້ງນີ້ ໄດ້ສະແດງໃຫ້ເຫັນນ້ຳໃຈເພື່ອນມິດສະຫາຍຢ່າງຈະແຈ້ງ, ຄວາມອົບອຸ່ນລະຫວ່າງທະຫານ ແລະ ປະຊາຊົນ ໄດ້ສ້າງຂຶ້ນດ້ວຍບັນດາການກະທຳຢ່າງແທດຈິງ, ມີວັດທະນະທຳມະນຸດ ແລະ ເຕັມໄປດ້ວຍຄວາມຮັບຜິດຊອບ.
