ອາເມລິກາ ຟື້ນຟູສ່ວນຫນຶ່ງລັດຖະດຳລັດຫ້າມຄົນເຂົ້າເມືອງ

ນີ້ເປັນຄັ້ງທຳອິດ ສານສູງສຸດ ອາເມລິກາ ຊື່ງແມ່ນອົງການຕຸລາການສູງສຸດຂອງ ອາເມລິກາ ໄດ້ອອກຄຳຕັດສິນຢ່າງເປັນທາງການສຳລັບລັດຖະດຳລັດຫ້າມຄົນເຂົ້າເມືອງຂອງປະທານາທິບໍດີ Donald Trump  ຊື່ງແມ່ນລັດຖະດຳລັດທີ່ຖືກປິດລ້ອມຈາກບັນດາສານຂັ້ນລຸ່ມເຮັດໃຫ້ເອກະສານນີ້ບໍ່ສາມາດມີຜົນສັກສິດ. ຄຳຕັດສິນຂອງສານສູງສຸດ ອາເມລິກາ ໄດ້ຮັບຖືວ່າຄືດັ່ງໄຊຊະນະເບື້ອງຕົ້ນຂອງ ປະທານາທິບໍດີ Donald Trump ແຕ່ຄຳຕັດສິນນີ້ ອາດຈະຖືກປ່ຽນແປງ ເມື່ອສານສູງສຸດ ອາເມລິກາ ຈະພິຈາລະນາ ທັງໝົດລັດຖະດຳລັດດັ່ງກ່າວໃນເດືອນ ຕຸລາ ຈະມາເຖິງ.

ລັດຖະດຳລັດຈຳກັດພົນລະເມືອງຕ່າງປະເທດເຂົ້າເມືອງ ໂດຍປະທານາທິບໍດີ Donald Trump  ເຊັນ ເມື່ອ ວັນທີ 6 ມີນາປີ 2017 ຊື່ງຫ້າມພົນລະເມືອງ 6 ປະເທດ ມີຊາວມຸດສະລິມກວມສ່ວນຫລາຍ ລວມມີ: ອີຣານ, ລີບີ, ໂຊມາລີ, ຊີຣີ, ຊູດັງ ແລະ ເຢເມນ ເຂົ້າເມືອງ ອາເມລິກາ ໃນເວລາ 90 ວັນ ແລະ ຢຸດຕິເລື່ອງອະນຸຍາດໃຫ້ຊາວອົບພະຍົບເຂົ້າເມືອງ ອາເມລິກາ ໃນເວລາ 120 ວັນ. ລັດຖະດຳລັດນີ້ໄດ້ຮັບການຕີລາຄາວ່າ ແມ່ນມີການດັດປັບບາງຢ່າງເມື່ອທຽບໃສ່ລັດຖະດຳລັດສະບັບເກົ່າທີ່ໄດ້ປະກາດໃນທ້າຍເດືອນມັງກອນ. ເຖິງຢ່າງໃດກໍຕາມ, ວົງການເຈົ້າຫນ້າທີ່ຕຸລາການ ຢູ່ລັດຕ່າງໆຂອງ ອາເມລິກາ ໄດ້ຖືວ່າ ເຖິງວ່າ ຂອບເຂດດັດປັບຂອງລັດຖະດຳລັດສະບັບໃຫມ່ຖືກຮັດແຄບ ແຕ່ເອກະສານນີ້ ຍັງຄົງສືບຕໍ່ແມ່ນສິ່ງທ້າທາຍສຳລັບພື້ນຖານລັດຖະທຳມະນູນ ເມື່ອມີການຈຳແນກສຳລັບສາສະຫນາໃດຫນຶ່ງ.

        ຕາມຄຳຕັດສິນຂອງສານສູງສຸດ ອາເມລິກາ ທີ່ຫາກໍ່ປະກາດໃຊ້, ສານດັ່ງກ່າວ ບໍ່ຫ້າມພົນລະເມືອງທັງໝົດຂອງ 6 ປະເທດດັ່ງກ່າວ ເຂົ້າເມືອງ ອາເມລິກາ ຫາກຍັງຄົງອະນຸຍາດໃຫ້ຜູ້ທີ່ມີການພົວພັນຢ່າງເໝາະສົມກັບບັນດາບຸກຄົນ ແລະ ອົງການຈັດຕັ້ງ ອາເມລິກາ ໄດ້ເຂົ້າເມືອງ, ຕົວຢ່າງຄື: ນັກສຶກສາມີຫນັງສືເຂົ້າໂຮງຮຽນ, ຄົນງານມີສັນຍາ ຫລື ຍາດຕິພີ່ນ້ອງຂອງຜູ້ທີ່ດຳລົງຊີວິດຢູ່ອາເມລິກາຢ່າງຖືກຕ້ອງຕາມກົດໝາຍ.

   ປະຕິກິລາຍາຈາກຫາງສຽງ

ພາຍຫລັງ ສານສູງສູດ ອອກຄຳຕັດສິນ ຟື້ນຟູ ສ່ວນຫນຶ່ງຂອງລັດຖະດຳລັດຫ້າມຄົນເຂົ້າເມືອງ, ປະທານາທິບໍດີ Donald Trump ໄດ້ຊົມເຊີຍຂໍ້ຕົກລົງນີ້. ທ່ານ ປະທານາທິບໍດີ Donald Trump  ເນັ້ນຫນັກວ່າ ຄຳຕັດສິນດັ່ງກ່າວຂອງສານ ແມ່ນໄຊຊະນະຢ່າງຈະແຈ້ງສຳລັບຄວາມສະຫງົບປອດໄພແຫ່ງຊາດ. ທ່ານປະທານາທິບໍດີ Donald Trump ເອີ້ນຄຳຕັດສິນນີ້ຄືດັ່ງເຄື່ອງມືຊ່ວຍໃຫ້ທ່ານສາມາດປົກປັກຮັກສາປະເທດ ອາເມລິກາ ຢ່າງມີປະສິດທິຜົນ. ມີທັດສະນະເຊັ່ນດຽວກັນ, ຜູ້ພິພາກສາ 3 ທ່ານ ໃນ ຈຳນວນ 9 ທ່ານຂອງສານສູງສຸດ ຖືວ່າ ລັດຖະດຳລັດຕ້ອງໄດ້ຮັບການຟື້ນຟູຢ່າງຄົບຖ້ວນ ແລະ ຜົນປະໂຫຍດແຫ່ງຊາດຕ້ອງແມ່ນເໜືອກວ່າສິ່ງໃດໝົດ. ກົງກັນຂ້າມ, ບັນດາສະມາຊີກລັດຖະສະພາ ອາເມລິກາ ຜູ້ທີ່ເຄີຍຄັດຄ້ານລັດຖະດຳລັດຫ້າມຄົນເຂົ້າເມືອງໄດ້ສະແດງຄວາມຜິດຫວັງເມື່ອຖືວ່າ ຄຳຕັດສິນຂອງສານສຸງສຸດ ໄດ້ສົ່ງຜົນສະທ້ອນເຖິງພື້ນຖານອະທິປະໄຕ ອາເມລິກາ. ໃນຂະນະນັ້ນ, ວົງການທະນາຍຄວາມ ອາເມລິກາ ຖືວ່າ ຄຳຕັດສິນຂອງສານ ແມ່ນສະແດງໃຫ້ເຫັນທັດສະນະດຸ່ນດ່ຽງລະຫວ່າງຄວາມສະຫງົບປອດໄພແຫ່ງຊາດ ແລະ ສິດທິມະນຸດ.

ບັນດາປະເທດຖືກຜົນສະທ້ອນຈາກລັດຖະດຳລັດຫ້າມເຂົ້າເມືອງ ຂອງອຳນາດການປົກຄອງຂອງທ່ານປະທານາທິບໍດີ Donald Trump  ກໍ່ໄດ້ມີປະຕິກິລິຍາເບື້ອງຕົ້ນ. ວົງການເຈົ້າຫນ້າທີ່ ເຢເມນ ສະແດງຄວາມຜິດຫວັງຕໍ່ຄຳຕັດສິນຂອງສານສູງສຸດ ອາເມລິກາ. ທ່ານ Ahmed al Nasi, ເຈົ້າຫນ້າທີ່ ຂຶ້ນກັບກະຊວງບັນດາບັນຫາກ່ຽວກັບຜູ້ອາໄສຢູ່ຕ່າງປະເທດ ຂອງ ເຢເມນ ໄດ້ຖືວ່າ ຄຳຕັດສິນດັ່ງກ່າວຈະບໍ່ຊ່ວຍຫຍັງໃນການຕໍ່ສູ້ຕ້ານການກໍ່ການຮ້າຍ ແລະ ລັດທິຫົວຮຸນແຮງ, ກົງກັນຂ້າມ ມັນຈະເຮັດໃຫ້ບັນດາປະເທດອິດສະລາມ ທີ່ມີສ່ວນກ່ຽວຂ້ອງ ຮູ້ສຶກວ່າ ເຂົາເຈົ້າພວມກາຍເປັນເປົ້າໝາຍ.

ໃນຂະນະນັ້ນ ໂດຍຄາດຄະເນລວ່ງຫນ້າບັນດາສິ່ງທີ່ສັບສົນຊື່ງ ຄຳສັ່ງຫ້າມຄົນເຂົ້າເມືອງກໍ່ຂຶ້ນ, ພາຍຫລັງສານສູງສຸດ ໄດ້ອອກຄຳຕັດສິນຟື້ນຟູສ່ວນຫນຶ່ງລັດຖະດຳລັດຫ້າມເຂົ້າເມືອງ, ກະຊວງປ້ອງກັນຄວາມສະຫງົບພາຍໃນຂອງອາເມລິກາ ໃຫ້ຮູ້ວ່າ ຈະປຶກສາຫາລືລະອຽດກັບກະຊວງຍຸຕິທຳ ແລະ ກະຊວງການຕ່າງປະເທດ ຂອງປະເທດນີ້ ເພື່ອສາມາດປະຕິບັດລັດຖະດຳລັດຢ່າງມືອາຊີບ ດ້ວຍການປະກາດຢ່າງຄົບຖ້ວນ ແລະ ເປີດເຜີຍເຖິງບັນດາຜູ້ທີ່ຖືກຜົນສະທ້ອນ ພ້ອມທັງຮ່ວມມືກັບບັນດາຄູ່ຮ່ວມມືໃນຂະແຫນງທ່ອງທ່ຽວ.

ຍັງບໍ່ທັນແມ່ນຄຳຕັດສິນສຸດທ້າຍ

ອາດຈະເຫັນໄດ້ວ່າ ມາຮອດຈຸດເວລານີ້ ຄຳຕັດສິນຂອງສານສູງສຸດ ແມ່ນໄຊຊະນະໃຫ້ແກ່ທ່ານປະທານາທິບໍດີ Donald Trump   ແຕ່ບໍ່ແມ່ນໄຊຊະນະສົມບູນ ເພາະ ບັນດາຜູ້ພິພາກສາ ໄດ້ກຳນົດບັນດາກໍລະນີຫ້າມຄົນເຂົ້າເມືອງ ອາເມລິກາ. ນັບແຕ່ນີ້ຮອດເດືອນ ຕຸລາ, ອຳນາດການປົກຄອງ ວໍຊີງຕັນ ຈະມີເວລາຕື່ມອີກເພື່ອກະກຽມຂໍ້ອ້າງເພື່ອຍື່ນສະເຫນີຂຶ້ນສານສູງສຸດ ອາເມລິກາ ໃນອາຍຸການຈະມາເຖິງຂອງສານ ເມື່ອບັນດາຜູ້ພິພາກສາຈະພິຈາລະນາລະອຽດກ່ຽວກັບສິດຂອງປະທານາທິບໍດີ ອາເມລິກາ ກ່ຽວຂ້ອງເຖິງບັນຫາຄົນເຂົ້າເມືອງ. ນີ້ແມ່ນຫນ້າທີ່ບໍ່ງ່າຍດາຍສຳລັບອຳນາດການປົກຄອງຂອງທ່ານປະທານາທິບໍດີ Donald Trump . ບັນດາສານສະຫະລັດໄດ້ສະກັດກັ້ນລັດຖະດຳລັດທີ່ມີຜົນສັກສິດໃນເດືອນ ກຸມພາ ແລະ ມີນາ ເປັນສອງຄັ້ງແລ້ວ ຍ້ອຍເຫດຜົນວ່າ ລັດຖະດຳລັດນີ້ ມີລັກສະນະຈຳແນກຕໍ່ກັບ  ຊາວມຸດສະລິມ ແມ່ນສິ່ງທີ່ທ່ານປະທານາທິບໍດີ Donald Trump  ບາງເທື່ອກໍ່ມີຄຳຕອບບໍ່ຈະແຈ້ງ.

ຄຳຕັດສິນດັ່ງກ່າວຂອງສານສູງສຸດ ອາເມລິກາ ໄດ້ຮັບຖືວ່າ ແມ່ນໄຊຊະນະເບື້ອງຕົ້ນ ດ້ວຍນະໂຍບາຍຮັດກຸ່ມຊາວຕ່າງປະເທດເຂົ້າເມືອງຂອງອຳນາດການປົກຄອງປະທານາທິບໍດີ Donald Trump  . ຄຳສັ່ງຫ້າມຄົນເຂົ້າເມືອງ ຈະໄດ້ຮັບການພິຈາລະນາຄືນໃນເດືອນ ຕຸລາ ຈະມາເຖິງ ແລະ ບໍ່ອາດຢັ້ງຢືນໄດ້ວ່າ ພາຍຫລັງນັ້ນຈະສືບຕໍ່ຫລືບໍ່. ແຕ່ວ່າ ບັນດາສິ່ງທີ່ພວມເກີດຂຶ້ນສະແດງໃຫ້ເຫັນວ່າ ຄວາມຂັດແຍ້ງດ້ານນິຕິທຳກ່ຽວຂ້ອງເຖິງບັນຫານີ້ ຍັງຂ້ຽວຂາດ ເມື່ອໄດ້ຮັບຖືວ່າ ແມ່ນການປ້ອງກັນຄວາມສະຫງົບອາເມລິກາ ແຕ່ກໍ່ແມ່ນສິ່ງທ້າທາຍສຳລັບລັດຖະທຳມະນູນ ອາເມລິກາ. ສິ່ງດັ່ງກ່າວສະແດງໃຫ້ເຫັນວ່າ ການຕໍ່ສູ້ພາຍໃນປະເທດ ອາເມລິກາ ຍັງຄົງສືບຕໍ່ເຄັ່ງຕຶງ ເມື່ອບັນດາບັນຫາກ່ຽວກັບຄວາມສະຫງົບປອດໄພພາຍໃນ, ສາສະຫນາ, ສິດຜົນປະໂຫຍດຂອງບັນດາຜູ້ເຂົ້າເມືອງ ຈະໄດ້ຮັບການຊັ່ງຊາກ່ອນທີ່ຈະມີຄຳຕັດສິນ.