 ទិដ្ឋភាពនៃសម័យប្រជុំជាន់ខ្ពស់ រំលឹកខួបលើកទី ៨០ ទិវាបង្កើតអង្គការសហប្រជាជាតិ។ រូបថត៖ VOV |
អញ្ជើញចូលរួមក្នុងពិធីនេះ មានប្រមុខរដ្ឋចំនួន ១០៣រូប នាយករដ្ឋមន្ត្រីចំនួន ៤៦ រូប រួមជាមួយតំណាងថ្នាក់ដឹកនាំជាន់ខ្ពស់នៃប្រទេសសមាជិកអង្គការសហប្រជាជាតិ និងថ្នាក់ដឹកនាំអង្គការអន្តរជាតិនិងតំបន់ជាច្រើន។ ប្រធានរដ្ឋវៀតណាម លោក លឿង គឿង បានដឹកនាំគណៈប្រតិភូជាន់ខ្ពស់វៀតណាមចូលរួមពិធីនេះ។
ថ្លែងក្នុងពិធីនេះ ប្រធានមហាសន្និបាតអ.ស.បនិតិកាលទី ៨០ លោកស្រី Annalena Baerbock បានសង្កត់ធ្ងន់ថា នេះជាឱកាសសម្រាប់បណ្តាប្រទេសអះអាង ឡើងវិញនូវការសន្យារបស់ខ្លួនចំពោះធម្មនុញ្ញអ.ស.ប ជាឯកសារមូលដ្ឋានបង្ហាញពីសេចក្តីប្រាថ្នា ជំនឿ និងក្តីសង្ឃឹមរបស់មនុស្សជាតិជុំវិញពិភពលោកសម្រាប់សន្តិភាព អភិវឌ្ឍន៍ និងសិទ្ធិមនុស្ស។ លោកស្រី Annalena Baerbock បានអំពាវនាវឱ្យប្រទេសសមាជិក ជំរុញកិច្ចសហប្រតិបត្តិការ គាំទ្រកំណែទម្រង់របស់អ.ស.ប ដើម្បីសម្របខ្លួនទៅនឹងយុគសម័យថ្មី និងអនុវត្តយ៉ាងហ្មត់ចត់នូវកាតព្វកិច្ចក្រោមធម្មនុញ្ញអង្គការសហប្រជាជាតិ រួមសាមគ្គីគ្នា និងចាត់វិធានការជាក់ស្តែង ដើម្បីដោះស្រាយបញ្ហាប្រឈម ជាសកល ដូចជា ភាពក្រីក្រ ជម្លោះ និងការប្រែប្រួលអាកាសធាតុ។
នៅក្នុងសុន្ទរកថារបស់លោក អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យប្រទេសទាំងអស់គោរពតាមច្បាប់អន្តរជាតិ លើកកម្ពស់ធម្មនុញ្ញអង្គការសហប្រជាជាតិ និងសហប្រតិបត្តិការគ្នាឆ្ពោះទៅរកសន្តិភាព យុត្តិធម៌ និងវឌ្ឍនភាពសម្រាប់មនុស្សគ្រប់រូប៕
