 ស្ពាន Long Bien |
ស្ពាននេះត្រូវបានរចនា និងសាងសង់ដោយជនជាតិបារាំងក្នុងរយៈពេល ៤ ឆ្នាំ (១៨៩៨ - ១៩០៣) ដើម្បីបម្រើការត្រួតត្រាវៀតណាមខាងជើងនាពេលនោះ។រួមជាមួយរោងមហោស្រពធំ សារមន្ទីរប្រវត្តិសាស្ត្រ ស្ពាន Long Bien គឺជាស្ថាបត្យកម្មបារាំងឆ្នើមមួយនៅរដ្ឋធានីហាណូយ។ អស់រយៈពេល ១២០ ឆ្នាំបានកន្លងផុតទៅហើយ ប៉ុន្តែស្ពាននេះនៅតែជារូបភាពដ៏ស្និទ្ធស្នាលចំពោះមនុស្សជាច្រើនជំនាន់ ហើយក្លាយទៅជានិមិត្តសញ្ញាវប្បធម៌ និងប្រវត្តិសាស្ត្រមួយនៃរដ្ឋធានី។
នៅចុងសតវត្សរ៍ទី ១៩ និងដើមសតវត្សរ៍ទី ២០ ស្ពាន Long Bien គឺជាស្ពានរចនាសម្ព័ន្ធដែកដ៏ធំសម្បើមបំផុតនៅអាស៊ីអាគ្នេយ៍។ នេះជាស្ពានសរសៃឈាមដើមដំបូងតភ្ជាប់ច្រាំងទន្លេក្រហមទាំងពីរ។ ស្ពាននេះ ត្រូវបានរចនាឡើងដោយមានផ្លូវដែកតែមួយគត់ដែលរត់នៅចំកណ្តាល ហើយអមនៅសង្ខាងជាផ្លូវសម្រាប់កង់ និងអ្នកដើរថ្មើរជើង។ ជាមួយនឹងរចនាសម្ព័ន្ធបែបនេះ ស្ពាន Long Bien បានក្លាយជាស្ពានដែកមួយក្នុងចំណោមស្ពានដែកធំជាងគេទាំង ៤ នៅលើពិភពលោកនាពេលនោះ។ លោក Manh Ha ស្ថាបត្យករម្នាក់ បានឲ្យដឹងថា៖ “នេះជាគម្រោងដ៏ពិសេសនៅទីក្រុងហាណូយ ព្រោះថាវាបានសាងសង់ពីដែកជាមួយប្រវែងជិត ៣ គីឡូម៉ែត្រ ឆ្លងទន្លេក្រហម តភ្ជាប់ខ័ណ្ឌ Long Bien ជាមួយខ័ណ្ឌ Hoan Kiem។ ក្នុងរយៈពេលជិតមួយសតវត្សរ៍កន្លងទៅនេះ ស្ពានបានដើរតួនាទីយ៉ាងសំខាន់ក្នុងជីវភាពរបស់ប្រជាជនហាណូយ”។
ស្ពាន Long Bien មិនត្រឹមតែល្បីឈ្មោះជាស្ពាន់ដែលមានអាយុកាលយូរឆ្នាំ ហើយមានស្ថាបត្យកម្មដ៏ពិសេសប៉ុណ្ណោះទេ ថែមទាំងត្រូវបានប្រជាជនរដ្ឋធានីហាណូយរំលឹកជាសាក្សីប្រវត្តិសាស្ត្រនៃរដ្ឋធានី។ នាដើមសរទរដូវឆ្នាំ ១៩៥៤ ស្ពាន Long Bien បានទទួលស្វាគមន៍កងទ័ពជ័យជំនះវិលប្រឡប់មករំដោះរដ្ឋធានី។ កងទ័ពអាណានិគមបារាំងបានដកខ្លួនចេញពីរដ្ឋធានីហាណូយ តាមផ្លូវលេខ៥ ចុះនាវានៅកំពង់ផែ Hai Phong ហើយចាកចេញពីប្រទេសវៀតណាម។ ទន្ទឹមនឹងនេះ ក្នុងសង្រ្គាមបំផ្លិចបំផ្លាញនៅភាគខាងជើងលើកទី ១ (១៩៦៥ - ១៩៦៨) និងលើកទី ២ ឆ្នាំ ១០៩៧ ស្ពាន Long Bien រងការទម្លាក់គ្រាប់បែកជាច្រើនដង។
នាបច្ចុប្បន្ននេះ រដ្ឋធានីហាណូយបានសងសង់ស្ពានថ្មីជាច្រើន ទំនើប និងធំជាង ធានាការធ្វើចរាចរណ៍យ៉ាងលូនសម្រាប់រដ្ឋធានី។ ប្រការនេះក៏មានន័យថា ស្ពាន Long Bien លឺថដើរតួនាទីជាសរសៃឈានក្នុងការធ្វើចរាចរណ៍ទៀតហើយ។ ឥឡូវនេះ ស្ពានទុកសម្រាប់អ្នកជិះកង ម៉ូតូ និងរថភ្លើងតែប៉ុណ្ណោះ។
ស្នូរសំឡេងនិងរូបភាពរថភ្លើង និងរថយន្តធ្វើដំណើរដំណើរទៅមកបានចារឹកក្នុងអនុស្សាវរីយ៍របស់ប្រជាជនរដ្ឋធានីហាណូយ។ លោក Tran Lam ពលរដ្ឋហាណូយម្នាក់បានចែករំលែកថា៖ “ខ្ញុំបានស្គាល់ស្ពាន Long Bien យ៉ាងជិតស្និទ្ធតាំងពីកុមារភាពមក ហើយបច្ចុប្បន្ននេះខ្ញុំមានអាយុ ៦០ ឆ្នាំហើយ។ ថ្ងៃណាដែលខ្ញុំមិនបានឆ្លងស្ពាន់នេះ ដោយសារនឿយហត់ ឬអាកាសធាតុមិនអំណោយផល គឺខ្ញុំនឹកវាណាស់”។
ចាប់តាំងពីពេលបើកសម្ពោធជាមួយនឹងរហស្សនាមថា "ស្ពានមួយក្នុងចំណោមស្ពានធំបំផុតទាំង ៤ នៅលើពិភពលោក" ឬ "គម្រោងដែកថែបដ៏ធំសម្បើមបំផុតនៅលើឧបទ្វីបឥណ្ឌូចិន" មក ស្ពាន Long Bien នៅតែរំលេចក្នុងចំណោមស្ពានទំនើបៗផ្សេងទៀត ហើយតែងតែមានលក្ខណៈស្ថាបត្យកម្មដ៏វិសេសវិសាលដោយឡែករបស់រដ្ឋធានីហាណូយ។
 ស្ពាន Long Bien |
ក្នុងឆ្នាំ ២០០៩ និងឆ្នាំ ២០១០ មហោស្រពស្ពាន Long Bien ចំនួនពីរត្រូវបានប្រារព្ធឡើងប្រកបដោយជោគជ័យនៅលើស្ពាននេះ។ នៅពេលនោះ ស្ពាន Long Bien បានក្លាយជាតំបន់ដើរថ្មើរជើង និងជាលំហតាំងពិពណ៌បម្រើប្រជាជន និងភ្ញៀវទេសចរអន្តរជាតិយ៉ាងច្រើនកុះករ។ ភ្ញៀវទេសចរស្ត្រីអាស៊ីម្នាក់បានចែករំលែកថា៖ “នៅពេលដើរថ្មើរជើងនៅលើស្ពាន Long Bien ពិតជាចាប់អារម្មណ៍ណាស់។ ភ្ញៀវទេសចរក៏អាចជិះកង់ និងម៉ូតូដើម្បីឆ្លងស្ពានផងដែរ។ នេះគឺជាគោលដៅគួរឲ្យទាក់ទាញសម្រាប់ភ្ញៀវទេសចរនៅរដ្ឋធានីហាណូយផងដែរ”។
អស់រយៈពេល ១២០ ឆ្នាំបានកន្លងផុតទៅហើយ ស្ពាន Long Bien នៅតែជាសក្ខីភាពនៃការផ្លាស់ប្ដូររបស់រដ្ឋធានីហាណូយ។ រាល់តម្លៃនៃអតីតកាលនៅតែដិតជាប់ក្នុងស្ពាននេះដដែល។ ប្រទេសជាតិអភិវឌ្ឍន៍ រដ្ឋធានីក៏រីកចម្រើន ប៉ុន្តែតម្លៃប្រវត្តិសាស្ត្រ និងលក្ខណៈនិមិត្តសញ្ញានៃស្ពាន Long Bien នៅតែស្ថិតស្ថេរគង់វង្យរហូតរៀងទៅផងដែរ៕
