ວີທະຍຸກະຈາຍສຽງ ຫວຽດນາມ: 80 ປີຮ່ວມເດີນທາງພ້ອມກັບປະເທດຊາດ

(VOVWORLD) - ວິທະຍຸກະຈາຍສຽງ ຫວຽດນາມ (VOV) ໄດ້ສ້າງເຂດວາງສະແດງພິເສດທີ່ງານວາງສະແດງຜົນງານຂອງປະເທດຊາດ “80 ປີແຫ່ງການເດີນທາງແຫ່ງຄວາມເອກະລາດ - ເສີລີພາບ - ຄວາມຜາສຸກ”. ແຫ່ງນີ້ບໍ່ພຽງແຕ່ເກັບຮັກສາບັນດາເອກະສານ, ວັດຖຸພັນທີ່ລ້ຳຄ່າເທົ່ານັ້ນ, ຫາກຍັງເລົ່າຄືນເລື່ອງລາວກ່ຽວກັບການເດີນທາງ 80 ປີສະໜິດຕິດພັນ, ຮ່ວມເດີນທາງພ້ອມກັບປະເທດຊາດອີກດ້ວຍ.

ງານວາງສະແດງ “80 ປີວິທະຍຸກະຈາຍສຽງ ຫວຽດນາມ ຮ່ວມເດີນທາງພ້ອມກັບປະເທດຊາດ” ຢູ່ສູນວາງາແດງແຫ່ງຊາດ ໄດ້ແນະນຳວັດຖຸພັນລ້ຳຄ່າຫຼາຍຢ່າງຂອງ VOV, ໂດຍການປະສານສົມທົບເຕັກໂນໂລຊີທັນສະໄໝເຂົ້າ ແລະ ຂຽນອະທິບາຍຄວາມໝາຍດ້ວຍ 2 ພາສາ.

ນີ້ແມ່ນໜຶ່ງໃນບັນດາການເຄື່ອນໄຫວທີ່ມີຄວາມໝາຍ ເນື່ອງໃນໂອກາດສະເຫຼີມສະຫຼອງ 80 ປີແຫ່ງໄຊຊະນະການປະຕິວັດເດືອນ ສິງຫາ (19 ສິງຫາ 1945 – 19 ສິງຫາ 2025), ວັນຊາດ ຫວຽດນາມ ທີ 2 ກັນຍາ ແລະ 80 ປີແຫ່ງວັນສ້າງຕັ້ງ VOV (07 ກັນຍາ 1945 – 07 ກັນຍາ 2025).

80 ປີໄດ້ຜ່ານພົ້ນໄປແລ້ວ, ນັບແຕ່ຊຸມມື້ທຳອິດທີ່ປະສົບກັບຄວາມຫຍຸ້ງຍາກມາຮອດປະຈຸບັນ, VOV ໄດ້ກາຍເປັນອົງການສື່ມວນຊົນຫຼາຍປະເພດທີ່ເຕີບໃຫຍ່ເຂັ້ມແຂງ.

ຢູ່ເຂດວາງສະແດງມີເຄື່ອງອຸປະກອນເຕັກນິກຫຼາຍປະເພດ, ໄມໂຄຣໂຟນ, ເຄື່ອງກະຈາຍຄື້ນວິທະຍຸ ທີ່ນຳໃຊ້ໃນບັນດາໄລຍະປະຫວັດສາດ, ໃນນັ້ນ ມີເຄື່ອງສົ່ງຄື້ນ 300W ໄດ້ຖ່າຍທອດສົດພິທີ ຖະແຫຼງປະກາດເອກະລາດ ຈາກສະໜາມຫຼວງ ບາດິ່ງ ໃນວັນທີ 02 ກັນຍາ 1945.

ເຄື່ອງອອກອາກາດຄຳຍອມຈຳນົນຂອງ ເຢືອງວັນມິງ ປະທານທິບໍດີ ສາທາລະນະ ຫວຽດນາມ ໃນຕອນທ່ຽງວັນທີ 30 ເມສາ 1975.

ໜຶ່ງໃນບັນດາວັດຖຸພັນທີ່ດຶງດູດຄວາມສົນໃຈແມ່ນລຳໂພງກະຈາຍສຽງແຫ່ງປະຫວັດສາດຢູ່ເຂດແຄມແມ່ນ້ຳ ຮ່ຽນເລືອງ (ກວາງຈິ) ດ້ວຍຄວາມແຮງ 500W.

ລຳໂພງຢູ່ທາງທິດເໜືອແຄມແມ່ນ້ຳ ເບັນຫາຍ ດ້ວຍຮູຖືກລູກປືນຍິງຫຼາຍຮູ, ເປັນສິ່ງພິສູດຢ່າງມີຊີວິດຊີວາໃຫ້ແກ່ “ສົງຄາມສຽງ” ຢູ່ເສັ້ນຂະໜານທີ 17.

ຈຸດພິເສດທີ່ສ້າງຄວາມປະທັບໃຈຢ່າງແຮງແມ່ນເຂດຊົມພາບສະເໝືອນຈິງ (VR), ເປັນແຫ່ງທີ່ຜູ້ມາຢ້ຽມຊົມສາມາດ “ຢ້ອນຄືນເວລາ” ຢູ່ສະໜາມຫຼວງ ບາດິ່ງ ໃນວັນທີ 02 ກັນຍາ 1945 - ຈຸດເວລາທີ່ ປະທານ ໂຮ່ຈີມິນ ອ່ານບົດຖະແຫຼງປະກາດເອກະລາດ, ສ້າງຕັ້ງປະເທດສາທາລະນະລັດ ປະຊາທິປະໄຕ ຫວຽດນາມ.

ພິເສດ, ຢູ່ເຂດວາງສະແດງຂອງ VOV, ຜູ້ຊົມຍັງມີໂອກາດຮັບຟັງຄືນບັນດາເທບບັນທຶກສຽງລາຍການກະຈາຍສຽງໃນຈຸດເວລາປະຫວັດສາດຂອງປະເທດຊາດຜ່ານແຕ່ລະຍຸກສະໄໝ.

ຢູ່ທີ່ນີ້, VOV ຍັງສ້າງພາບຈຳລອງຖ້ຳ ເຈິ່ມ (ຮ່າໂນ້ຍ) - ເປັນສະຖານທີ່ຍົກຍ້າຍທຳອິດຂອງ VOV ແລະ ແມ່ນແຫ່ງກະຈາຍ “ຄຳຮຽກຮ້ອງທົ່ວປະເທດຕໍ່ຕ້ານ” ຂອງປະທານ ໂຮ່ຈີມິນ ໃນວັນທີ 19 ທັນວາ 1946.

ບັນດານ້ອງນ້ອຍມີຄວາມປະຕິຊົມຊື່ນເມື່ອໄດ້ລອງເປັນໂຄສົກຂອງ VOV.

ຕໍ່ຄວາມມັກຮັກ ແລະ ຄວາມປາດຖະໜາຢາກໄດ້ຮັບຂອງຂວັນຂອງມະຫາຊົນເປັນຈຳນວນຫຼາຍ, ເຂດວາງສະແດງ “80 ປີວິທະຍຸກະຈາຍສຽງ ຫວຽດນາມ ຮ່ວມເດີນທາງພ້ອມກັບປະເທດຊາດ” ໄດ້ແກ່ຍາວເວລາເປີດປະຕູຮອດວັນທີ 15 ກັນຍາ 2025 (ປ່ຽນໃຫ້ການປິດປະຕູໃນວັນທີ 05 ກັນຍາ ຄືແຜນກ່ອນໜ້ານັ້ນ) ຢູ່ເຂດ 8, ສູນວາງສະແດງແຫ່ງຊາດ ຫວຽດນາມ (VEC), ໂກລວາ, ດົງແອັງ, ຮ່າໂນ້ຍ.